OpenAI süni intellektə olan etimadı yeni səviyyəyə qalxardır: yaxın gələcəkdə ChatGPT istifadəçilərə birbaşa bank hesablarına çıxış imkanı verəcək.

Bugün təqdim edilən önizləmə funksiyası istifadəçilərə ChatGPT-ni Plaid platforması ilə təhlükəsiz şəkildə birləşdirməyə imkan verir. Plaid bankları tətbiqlərlə birləşdirən platforma kimi 12 000-dən çox maliyyə qurumunu, o cümlədən Schwab, Fidelity, Chase, Capital One və digər bankları əhatə edir.

OpenAI açıqlayıb ki, "artıq ayda 200 milyondan çox insan maliyyə sualları üçün ChatGPT-yə müraciət edir – büdcədən tutmuş xərcləri azaltmaq üzrə məsləhətlərə qədər". İstifadəçilər indi maliyyə hesablarını Plaid vasitəsilə təhlükəsiz qoşaraq, şəxsi məqsəd, həyat tərzi və üstünlüklərinə uyğun maliyyə vəziyyətlərini tam izləyə bilərlər.

Hesablar qoşulduqda, ChatGPT istifadəçilərə xərclərin tarixçəsini və aktiv abunəlikləri əks etdirən idarəetmə paneli təqdim edir. Bundan əlavə, ev almaq, kredit kartı açmaq kimi maliyyə qərarlarında kömək və xərclərdəki dəyişikliklərin aşkar edilməsi mümkündür.

Bu maliyyə xüsusiyyəti ilkin olaraq ABŞ-dakı 200 dollar qiymətində olan Pro abunəçiləri üçün əlçatan olacaq. OpenAI əvvəlcə erkən istifadə müddətindən öyrənəcək və təkmilləşdirəcək, sonra isə funksiyanı Plus səviyyəsinə yayacaq. Hədəf isə xidmətin hər kəs üçün əlçatan olmasıdır.

Yanvar ayında təqdim olunan ChatGPT Health xidməti kimi, bu yenilik də istifadəçi məlumatlarının məxfiliyinə və təhlükəsizliyinə böyük önəm verir.

OpenAI istifadəçilərə məlumatların istifadəsinə nəzarət imkanı verir. İstifadəçilər istənilən vaxt bank hesablarının əlaqəsini kəsə bilər, həmçinin ChatGPT-də saxlanılan maliyyə məqsədləri və öhdəliklər kimi "maliyyə xatirələrini" silə bilərlər. Bundan əlavə, istifadəçilər məlumatlarının süni intellekt modellərində təlim üçün istifadə olunmasına razılıq verə və ya bu imkanı deaktiv edə bilərlər.

ChatGPT bank hesablarında heç bir dəyişiklik edə bilməz və tam hesab nömrələrini görə bilməz. Lakin balanslar, əməliyyatlar, səhmlər portfeli, ipoteka və kredit kartı borcları kimi məlumatları əldə edə bilər.

OpenAI hələlik bu maliyyə məlumatlarının şirkət daxilində süni intellektin təlimi xaric digər məqsədlərlə necə istifadə olunacağı və məlumatların kiberhücumlara qarşı əlavə qorunması barədə geniş məlumat verməyib.