ABŞ Xəstəliklərin İdarə Olunması və Qarşısının Alınması Mərkəzi (CDC) 2025-ci ildə narkotik overdazından ölüm hallarının təxminən 14 faiz azaldığını açıqlayıb. Bu, növbəti üçüncü il ardıcıl azalma deməkdir.

Çərşənbə günü açıqlanan məlumatlarda bildirilir ki, 2025-ci ildə ABŞ-da narkotik overdazından ölənlərin sayı təxminən 70 min nəfər olub. Bu, 2024-cü ilin 81 min üstü ölüm rəqəmi ilə müqayisədə əhəmiyyətli azalma deməkdir.

Bu azalma ABŞ-da daha çox sintetik opioidlərlə bağlı olan ölüm halları böhranının zəifləməsi kimi qarşılanıb. Pandemiya dövründə 2022-ci ildə overdazdan ölənlərin sayı 110 minə çatmışdı. Bu artım sosial izolyasiya və müalicə xidmətlərinə çıxışın məhdudlaşması ilə əlaqələndirilir.

Brown Universitetinin tədqiqatçısı Brandon Marşal Associated Press-ə verdiyi açıqlamada sözlərini belə davam etdirib: “Mən ehtiyatla nikbinəm ki, bu, overdaz böhranının əsaslı şəkildə dəyişdiyini göstərir.”

Ekspertlər bu azalma səbəbləri kimi overdaza qarşı istifadə edilən nalokson (ticarət adı Narcan) kimi dərman vasitələrinin daha geniş yayılmasını və fentanyl aşkarlayan test zolaqlarının daha çox istifadəsini qeyd edir. Çin tərəfindən dərman istehsalında istifadə olunan kimyəvi maddələrə məhdudiyyətlərin tətbiqi də bu prosesə təsir göstərib.

2025-ci ildə ABŞ-ın əksər ştatlarında overdazdan ölüm halları azalıb, lakin Arizonada, Kolorada və Yeni Meksikoda bu rəqəmlər 10 faiz və daha çox artıb.

Keçmiş prezident Donald Trampın administrasiyası ümumi azalmaya narkotik qaçaqmalçılığına qarşı aparılan sərt tədbirlərin təsiri kimi baxır. Mayın əvvəlində Ağ Ev açıqlamasında narkotik overdazından ölüm hallarının ölkənin ən ciddi ictimai səhiyyə problemlərindən biri olduğunu vurğulayıb.

Federal Təhqiqata Bürosunun (FBI) direktorluğuna təyin olunmuş Kaş Patel isə sosial media paylaşımında 2025 və 2026-cı illərdə agentliyin kifayət qədər fentanyl müsadirə etdiyini və bunun 200 milyon ABŞ vətəndaşını öldürmək potensialına malik olduğunu iddia edib. Bu rəqəm ölkə əhalisinin yarısından çoxuna bərabərdir.

Keçmiş ədliyyə naziri Pam Bondi Tramp administrasiyasının ilk 100 günündə narkotik müsadirələr sayəsində 119 milyon insanın həyatının xilas olunduğunu bildirmiş, daha sonra bu rəqəmi 258 milyon nəfərə qədər artırmışdı. Ekspertlər bu iddiaları şişirdilmiş hesab edir.

Tramp administrasiyası overdazların qarşısının alınmasına yönəlmiş hökumət proqramlarını ixtisar edib və bu, fəalların tənqidinə səbəb olub. Məsələn, ötən ay hökumət narkotik istifadəçilərinə fentanyl olub-olmadığını yoxlamağa kömək edən test zolaqları üçün maliyyə dəstəyini dayandırdığını açıqlayıb.