Türkiyə 194 ölkə arasında 86 milyon 90 min əhali sayı ilə 18-ci yerdə qərarlaşıb və Avropa İttifaqı (Aİ) ölkələrinə nisbətən xeyli gənc əhalı tərkibinə malikdir. Bu barədə iyulun 9-da Dünya Əhalisi Günü ərəfəsində açıqlanan rəsmi məlumatlarda bildirilib.

Türkiyə Statistika İnstitutunun (TÜİK) BMT-nin ən son əhali təxminlərinə istinadən açıqladığı məlumatlara görə, dünya əhalisinin 2025-ci ilin ortalarına qədər 8,23 milyard nəfərə çatacağı proqnozlaşdırılır.

Dünyanın ən çox əhalisi olan ölkəsi Hindistan olub, orada 1,46 milyard insan yaşayır. Hindistandan sonra Çin 1,42 milyard, ABŞ isə 347 milyon 300 min nəfərlə gəlir. Bu üç ölkə dünya əhalisinin 39,2 faizini təşkil edir.

86 milyon 90 min əhalisi ilə Türkiyə dünyada 18-ci sıradadır və qlobal əhalinin təxminən 1 faizinə malikdir.

Bu rəqəmlər hər il 11 iyulda qeyd olunan Dünya Əhalisi Günü öncəsi açıqlanıb. Həmin gün BMT-nin İnkişaf Proqramı (UNDP) tərəfindən 1987-ci il iyulun 11-də dünya əhalisinin 5 milyarda çatması səbəbindən təsis olunub.

Məlumatlarda Türkiyənin Aİ ilə müqayisədə daha gənc əhali strukturu diqqət çəkir.

2025-ci ildə Türkiyədə uşaqlar əhalinin 24,8 faizini təşkil edəcək ki, bu göstərici Aİ-nin 27 üzv ölkəsinin hər birindən yüksəkdir. Aİ-də uşaqların ən çox payı İrlandiyada 22,3 faiz təşkil edir.

Gənc demoqrafik quruluşa baxmayaraq, Türkiyənin əhalisi yaşlanmaqdadır. 65 yaşını keçirənlər ölkə əhalisinin 11,1 faizini təşkil edir ki, bu da qlobal orta göstərici olan 10,4 faizdən xeyli yüksəkdir, lakin Aİ-nin bütün üzv dövlətləri ilə müqayisədə aşağıdır.

Dünyada ən yüksək yaşlı əhali payı Monakoda qeydə alınıb və ora yaşlılar əhalinin 36 faizini təşkil edir.

Türkiyədə doğum vaxtı gözlənilən ömür müddəti də qlobal orta səviyyədən yüksəkdir. ÜNS proqnozlarına əsasən, kişilərin ömrü 75,5, qadınların isə 80,7 ildir.