Ankara ABŞ-ın Türkiyəyə qarşı müdafiə sektoru ilə bağlı bütün sanksiyaları aradan qaldıracağını gözləyir, Türkiyə müdafiə rəsmiləri belə bildirib.

Ankara Müdafiə Nazirliyinin rəsmiləri yerli mediaya deyiblər ki, “Amerikanın Rəqiblərinə Qarşı Sanksiyalara Nəzər” (CAATSA) aktından irəli gələn, alyans ruhuna uyğun olmayan sanksiyaların və müdafiə sənayesinə yönəlik bütün görünən və gizli məhdudiyyətlərin aradan qaldırılması gözlənilir.

Rəsmi şəxslər Trampın açıqlamalarını səmimi etimad və həmrəylik istiqamətində addım kimi qiymətləndiriblər.

Donald Tramp 7 iyulda Türkiyə Prezidenti Rəcəb Tayyib Ərdoğanla görüşündə Vaşinqtonun Türkiyəyə qarşı tətbiq etdiyi sanksiyaları götürəcəyini bildirib. Bu, müdafiə əlaqələrində böyük irəliləyiş kimi qəbul olunub.

Tramp jurnalistlərə deyib: “Sanksiyaları qaldıracağımızı sizinlə bölüşə bilərəm. Onun bu suala cavab verməsi vaxt itkisi olmasın deyə bunu demək istəyirəm... Sanksiyaları götürəcəyik. İndi bunun vaxtıdır. Dostlara sanksiya qoymaq istəmirik.”

Türkiyənin F-35 qırıcısı proqramına mümkün qayıdışı ilə bağlı suallar verildikdə, Tramp qərarın tezliklə veriləcəyini vurğulayıb. “Əlaqələrimiz hazırda çox yaxşıdır,” - deyə o əlavə edib.

Vaşinqton 2019-cu ildə Türkiyənin Rusiya istehsalı S-400 hava müdafiə sistemlərini almaq və yerləşdirmək qərarından sonra CAATSA çərçivəsində sanksiyalar tətbiq etmişdi. Bu addım Türkiyənin çoxmillətli F-35 layihəsindən çıxarılmasına səbəb olmuşdu.

Yunanıstan Baş naziri Kiriyakos Mitsotakis’in Türkiyənin F-35 qırıcısı almaq niyyətinə qarşı çıxışı ilə bağlı rəsmi şəxslər bölgədə gərginliyi artıracaq fikirlərdən çəkinməyi tövsiyə edib.

Türkiyə rəsmiləri bildirir ki, “Türkiyə bölgədə sülh və sabitliyin qorunmasını, mövcud problemlərin konstruktiv dialoq və qonşuluq münasibətləri çərçivəsində həllini dəstəkləyir.”

“Biz bir daha vurğulayırıq ki, Türkiyə Silahlı Qüvvələri özlərinə təhdid yaratmayan kiməsə təhdid deyil.”