Teksasda bir nəfər «Tesla Cybertruck» model avtomobilini məqsədli olaraq gölə sürməsi və «wade mode» funksiyasından istifadə etməyə cəhd göstərməsi səbəbindən saxlanılıb.

Grapevine polis idarəsi bildirib ki, onların əməkdaşları bazar ertəsi günü şimal Teksasda yerləşən Grapevine gölünə çağırılıb. Avtomobil su altında qalaraq hərəkətsiz vəziyyətdə qaldığından sürücü və sərnişinlər onu tərk edib.

«Wade mode» funksiyası «Tesla»nın onlayn təlimatına əsasən «Cybertruck»un ətraflarında, məsələn, çaylar və dərələr kimi su hövzələrində 81,5 sm (32 düym) dərinliyə qədər hərəkət etməsinə imkan verir.

Polis bildirir ki, sürücü avtomobili gölə qəsdən sürdüyünü və nəticədə maşının sıradan çıxdığını və su aldığını etiraf edib. Onu gölün bağlanmış hissəsində avtomobil idarə etmək və digər su təhlükəsizliyi qaydalarını pozmaqda ittiham ediblər.

Avtomobil gölün cənub sahilinin yaxınlığından qismən su altında çıxarılıb. Əməliyyatda polisə Grapevine Yanğın Departamentinin Su Qurtarma Qrupu kömək edib.

Polis açıqlamasında qeyd edib ki, «Hərçənd avtomobil fiziki olaraq səthi və təmiz suda hərəkət edə bilsə də, bu, Teksas qanunları çərçivəsində hüquqi və təhlükəsizlik problemləri yarada bilər».

Grapevine polis idarəsindən Katharina Gamboa bildirib: «Avtomobilinizi bilərəkdən suya sürməyi tövsiyə etmirik. Bu, təkcə təhlükə yaratmır, həm də qanuni məsələdir».

«Tesla Cybertruck» raket gövdəli, gülləkeçirməz polad materialdan hazırlanmış elektrikli pikapdır. Onun qiyməti 70 min dollardan başlayır. 2019-cu ildə təqdim olunub və 2023-cü ildə geniş ictimaiyyətə təqdim edilib.

Şirkətin avtomobil təlimatında sürücünün «istənilən su hövzəsinin dərinliyini ölçmək məsuliyyəti» olduğu göstərilir. Bundan başqa, suya sürmə nəticəsində avtomobilin zədələnməsi və ya su keçməsi zəmanətə daxil deyil.

«Wade mode» funksiyasının maksimum dərinliyi təxminən 32 düym (815 mm) təkərin alt səviyyəsindən ölçülür. Daha dərin yerlərdə sürücülərə təlimatda suyun dərinliyi az olan və ya quru sahəyə qayıtmaq tövsiyə olunur.

İstehsalçı eyni zamanda güclü axın və sürətli su hövzələrində, məsələn, çayın sürətli axınında maşını idarə etməməyi tövsiyə edir.