Kaliforniyanın Santa Klara dairəsi "Meta Platforms" şirkətinə qarşı yeni məhkəmə iddiası qaldırıb. Bu çoxmillətli nəhəng "Facebook", "Instagram", "WhatsApp", "Messenger" və "Threads" platformalarını idarə edir.

Dairənin bu həftə verdiyi iddiada "Meta"nın bilərəkdən fırıldaq reklamlarından gəlir əldə etdiyi bildirilir. İddia edilir ki, bu qanunsuz reklamlar şirkətə illik 7 milyard dollar gətirib.

Santa Klara dairəsinin vəkili Toni LoPresti açıqlayıb ki, "Meta" sistemində fırıldaqçı reklamlara qarşı nəzarət zəifdir və şirkət yalnız 95 faiz şübhəli reklam verənləri bloklayır. Digər şübhəlilər isə əlavə ödənişlə reklamlarını yayımlamağa davam edir. İddialara görə, fırıldaqlara maliyyə fırıldaqları, kriptovalyuta sxemləri, müalicəsi mümkün olmayan xəstəliklər üçün saxta dərmanların təbliği, faydasız qida əlavələri və məşhurların adından vəsait tələb etmə cəhdləri daxildir.

Santa Klara dairəsi vurğulayıb ki, Kaliforniya sakinləri 2024-cü ildə fırıldaqçılara qarşı 2,5 milyard dollar itirib, xüsusilə yaşlılar daha çox zərər görüb.

"Meta" şirkətinin nümayəndəsi Stoun bildirib ki, fırıldaqçılığa qarşı mübarizə həm onların platformalarında, həm də onlardan kənarda davam edir. Şirkət ötən il 159 milyon saxta reklamı silib və hüquq-mühafizə orqanları ilə əməkdaşlıq edir.

Santa Klara dairəsi ABŞ-ın Silikon Vadisinin əsas hissəsini təşkil edir və dünyanın ən zəngin bölgələrindən biridir. İddia Kaliforniya və xüsusilə Santa Klara sakinlərinin adı ilə verilib. Toni LoPresti deyib: "Biz bu texnologiya nəhənginin istifadəçiləri aldatmaq üçün dünya miqyasında fırıldaq sxeminə davam etməsinə icazə verə bilmərik."