Ötən ay "Silicon Valley Bank"ın müştəriləri milyardlarla dolları geri çəkmək üçün tələsəndə, vençur kapitalisti Arlan Hamilton (Arlan Hamilton) əmək haqqı fondlarına çıxışı itirməkdən qorxan rəngli təsisçilərdən bəzilərinə kömək etmək üçün addım atdı.

"SVB" onunki kimi az təmsil olunan icmalardan olan insanlara xidmət göstərmək reputasiyasına malik idi. Onun uğursuzluğu, bank sektorundakı kredit ayrı-seçkiliyi və bunun nəticəsində rəngli insanlar üçün kapitalda yaranan bərabərsizliklər barədə sənaye mütəxəssislərinin narahatlıqlarını yenidən alovlandırıb.

Backstage Capital şirkətinin 43 yaşlı təsisçisi və idarəedici tərəfdaşı Hamilton bildirib ki, rəngli sahibkarlara gəldikdə, "biz artıq daha kiçik bir evdə yaşayırıq. Bizdə artıq köhnə qapı və nazik divarlar var. Beləliklə, bir tornado gələndə biz daha çox zərər çəkəcəyik."

1983-cü ildə yaradılan orta ölçülü Kaliforniya texnologiya kreditoru, 10 martda süquta uğramazdan əvvəl 2022-ci ilin sonunda Amerikanın 16-cı ən böyük bankı idi. "SVB" Birləşmiş Ştatlardakı vençur dəstəkli texnologiya və həyat elmləri şirkətlərinin təxminən yarısına bank xidmətləri göstərirdi.

Hamilton, sənaye mütəxəssisləri və digər investorlar CNN-ə bildiriblər ki, bank azlıq təşkil edən sahibkarlar cəmiyyətini inkişaf etdirməyə sadiq idi və onlara həm sosial, həm də maliyyə kapitalı təqdim edirdi.

Hamilton deyib ki, "SVB" mütəmadi olaraq azlıq təşkil edən sahibkarlar üçün konfranslara və şəbəkələşmə tədbirlərinə sponsorluq edib və o, qaradərili investorları birləşdirən və gücləndirən qeyri-kommersiya təşkilatı BLK VC tərəfindən irəli sürülən illik "State of Black Venture Report" hesabatını maliyyələşdirməsi ilə tanınıb.

25 illik sahibkar və Rising Tide Capital qeyri-kommersiya təşkilatının baş inkişaf və innovasiya direktoru Coynikol Martines (Joynicole Martinez) deyib: "Başqa banklar yox deyəndə, "SVB" bəli deyərdi." Təşkilat sahibkarları investorlar və mentorlarla əlaqələndirmək üçün 2004-cü ildə təsis edilib.

Martines həm də iş və karyera məşqçiləri üçün yalnız dəvətnamə ilə qəbul olunan "Forbes Coaches Council"ın rəsmi üzvüdür. O bildirib ki, "SVB" rəngli sahibkarlar üçün əvəzsiz bir resurs olub və müştərilərinə endirimli texnoloji alətlər və araşdırma maliyyəsi təklif edib.

**Bir çox qadın və rəngli insanlar rədd edildiklərini deyirlər** Minoritar biznes sahibləri diskriminasiyalı kreditləşmə təcrübələri səbəbindən uzun müddət kapital əldə etməkdə çətinliklərlə üzləşiblər. Federal Ehtiyat Banklarının hamısının əməkdaşlığı ilə aparılan "Small Business Credit Survey"in (Kiçik Biznes Kredit Sorğusu) məlumatları bank və qeyri-bank kreditləri üçün imtina nisbətlərindəki fərqləri göstərir.

Sorğuya əsasən, 2021-ci ildə qaradərili rəhbərlik etdiyi şirkətlərin təxminən 16%-i banklardan istədiyi ümumi biznes maliyyəsini əldə edib, ağdərili sahibli şirkətlərdə isə bu nisbət 35% olub.

Martines CNN-ə deyib: "Biz bilirik ki, kreditləşmə və bank işində tarixi, sistemli və açıq-aşkar irqçilik var. Biz oradan başlamalı və bu məsələnin ətrafında dolaşmamalıyıq."

Asiya Bredli (Asya Bradley), qaradərili amerikalılara nəsil sərvəti qurmağa kömək etmək məqsədi daşıyan maliyyə xidmətləri şirkəti Kinley kimi bir neçə texnoloji şirkətin mühacir təsisçisi, "SVB"ın süqutundan sonra 1.000-dən çox mühacir biznes təsisçisinin olduğu bir "WhatsApp" qrupuna qoşulduğunu deyib. O bildirib ki, qrupun üzvləri bir-birlərini dəstəkləmək üçün tez bir zamanda səfərbər olublar.

Bredli deyib ki, mühacir təsisçilərin çox vaxt ABŞ-da Sosial Müdafiə nömrələri və ya daimi ünvanları olmur və onları tanımayan bir sistemdə maliyyə tapmaq üçün müxtəlif yollar düşünmək çox vacib idi.

"İcma həqiqətən xüsusi idi, çünki bu insanların bir çoxu fərqli yolları bölüşürdü."