Türkiyə Mənzil İnşaatçıları və İnvestorlar Assosiasiyasının (KONUTDER) nümayəndələri Oman Mənzil və Şəhərsalma Naziri Xalfan Əl Şueili rəhbərliyindəki heyətlə İstanbuldakı görüşdə daşınmaz əmlak inkişafı, şəhərsalma və investisiya layihələrində əməkdaşlıq perspektivlərini müzakirə edib.

Görüşdə Omanın dövlət qurumları, investisiya təşkilatları və daşınmaz əmlak şirkətlərinin yüksək vəzifəli nümayəndələri ilə Türkiyənin aparıcı mənzil inşaatçıları iştirak edib.

Xalfan Əl Şueili, türk tikinti şirkətləri ilə omanlı investorlar arasında əməkdaşlığın hər iki ölkə üçün əhəmiyyətli imkanlar yaradacağını bildirib. O, KONUTDER üzvlərini Omanda davam edən və planlaşdırılan layihələrlə tanış olmağa dəvət edib.

Nazir həmçinin 5-8 oktyabrda Omanın təşkil edəcəyi Urban October–Urban, Home & Build Expo sərgisinə türk şirkətlərinin qatılmasını təşviq edib. O, bu tədbiri sənaye əlaqələrinin inkişafı üçün vacib platforma adlandırıb.

KONUTDER sədri Ziya Yılmaz görüşün yalnız mövcud imkanların qiymətləndirilməsi deyil, həm də iki ölkənin özəl sektoru arasında uzunmüddətli əməkdaşlıq üçün baza yaratmağı hədəflədiyini bildirib.

Yılmaz deyib: “Türkiyənin inşaat sahəsində təcrübəsi və Omanın şəhər inkişafı strategiyası birgə layihələr vasitəsilə hər iki ölkəyə əlavə dəyər gətirəcək. Bu görüşü uzunmüddətli işbirliklərinin və real investisiyaların başlanğıcı hesab edirik.”

Tədbir zamanı nümayəndələr birgə inkişaf modelləri və bilik mübadiləsi təşəbbüsləri haqda da fikir mübadiləsi aparıb.