Cat Stevens adı ilə etdiyi albomlarla 1960 və 1970-ci illərə damğa vuran, 1977-ci ildə isə müsəlman olmağı seçən ifaçı, mahnı sözü yazarı və musiqiçi Yusuf İslam (Yusuf Islam) bildirib: “Biri yeni müsəlman olanda mədəniyyətini qapının kənarında buraxmaq məcburiyyətində deyil. Ancaq müəyyən qədər öyrənməli və sonra istəklərini idarə etməlisən. Bunu İslami dəyərlərin mahiyyəti ilə eyniləşdirməlisən.”

İnstitut Sosial ilə NUN Təhsil və Mədəniyyət Vəqfinin ev sahibliyi etdiyi, qlobal böhranların əsas səbəbləri və tarixi müstəmləkəçilik irsinin müzakirə olunduğu Dünya Dekolonizasiya Forumu “Anadolu Agentliyi”nin (AA) Qlobal Kommunikasiya Tərəfdaşlığı ilə bu gün İstanbulda başlayıb.

Forumda jurnalist və aparıcı Elif Bereketlinin moderatorluğu ilə keçən “Decolonial Voice” (Dekolonizasiya Səsi) başlıqlı paneldə çıxış edən Yusuf İslam, musiqidə dekolonizasiyanın çox həyati bir mövzu olduğunu bildirərək, “Harada olduğumuzu və buraya necə gəldiyimizi anlamaq baxımından bu mövzu çox vacibdir,” ifadəsini işlədib.

Öz həyatından və müsəlman olduğu dövrdə yaşadığı çətinliklərdən nümunələr verərək dünyanı musiqi ilə birləşdirməyin və əlaqələr qurmağın vacib olduğunu söyləyən İslam sözlərinə davam edib:

“Mənim səyahətim Londonda başladı. Atam Yunan, anam İsveçlidir. Zatən burada bir sıra mədəni fərqliliklərdən keçməyim lazım idi. Əlbəttə ki, doğulduğun mədəniyyətdən təsirlənirsən. Londonda məktəbə getdim, orada mahnılar, ilahilər oxudum, ilahilərdən sonra rok musiqisinə keçdim, bu da mədəniyyətin bir hissəsidir.”

“Müsəlmanlar gitaranı Bağdaddan İspaniyaya gətirdi”

Usta sənətçi, İslam dinini seçdiyi ilk illərdə yaşadığı çətinliklərdən bəhs edərək deyib:

“Mən müsəlman olduğum zaman elə bir an vardı ki, müsəlman dünyasının mədəniyyətləri də məni müstəmləkə edirdi. ‘Niyə başına sarıq taxmırsan?’ ya da ‘Niyə gitara çalırsan?’ deyirdilər. Bir düşüncə həddən artıq səviyyəyə çatmışdı və o nöqtədə musiqi də qadağan idi. Buna görə də mən bu anlayışda tam bir dəyişiklikdən keçdim. O zaman, ‘Müsəlmanlar gitaranı Bağdaddan İspaniyaya gətirdi, İspaniyadan Avropaya gəldi, indi o gitara əlimizdədir’ deyə düşünməyə başladım. ‘Mən bunun harasındayam?’ deyə düşündüm. Biri yeni müsəlman olanda mədəniyyətini qapının kənarında buraxmaq məcburiyyətində deyil. Ancaq müəyyən qədər öyrənməli və sonra istəklərini idarə etməlisən. Bunu İslami dəyərlərin mahiyyəti ilə eyniləşdirməlisən.”

“Musiqinin həyatımız üzərində həmişə təsiri var”

Günümüzdə musiqi sənayesindəki rəqəmsallaşmaya da diqqət çəkən Yusuf İslam deyib: “İndi məncə, musiqi fəaliyyətinin idarə olunması daha da pisdir. Məsələn, “Spotify”ın alqoritmləri. Yenə də musiqi texnologiyası ya da texnologiyanın özü və sosial media, fərdlər üçün çox gözəl bir fürsət verdi. Kameranın qarşısında öz-özünə durub istedadını sərgiləyən birisi 10 milyon baxış ala bilir. Əgər insanın həyatında bir qayəsi varsa, Allah bunun yolunu göstərir. Bir şeyi çox istəyirsə inşallah o olur, amma haraya getdiyinizi və bu işi görməkdəki məqsədinizin nə olduğunu bilməlisən. ‘Musiqi olaraq rəqabət edəcəm’ deyirsinizsə, o iş elə olmur.”

İslam, musiqiyə baxış açısının Bosniya müharibəsi illərində dəyişdiyini dilə gətirərək bunları qeyd edib:

“Bilirsiniz, bir zamanlar musiqinin haram olduğuna inandığım bir dövr vardı. Ondan sonra Bosniyadakı hadisələr baş verdi və mən orada bir sıra xilasetmə işlərinə başladım. Bosniyalıların mahnılarını eşitdim. Orada eşitdiyim mahnılar içimdə bir sıra güclü hisslər oyatdı.”