RİYAZİYYAT DƏHASI: Bernard Arnault-un ailə holdinqi Agache, Fransanın ən yaxşı mühəndislik məktəbi olan École Polytechnique-də yeni riyaziyyat və əsas elmlər institutunun yaradılmasına 50 milyon avro sərmayə yatırır. Bernard Arnault həmin məktəbdən 1969-cu ildə məzun olub və LVMH Moët Hennessy Louis Vuitton-un prezidenti və baş icraçı direktoru vəzifəsini icra edir.

Yeni bina Parisin cənubunda, Palaiseau kampusunda 2030-cu ilə qədər açılacaq. Bu mərkəz Fransa üçün mükəmməllik mərkəzi və beynəlxalq tədqiqat əməkdaşlığının mərkəzi kimi fəaliyyət göstərəcək. İnstitut ölkənin və məktəbin akademik və texnoloji sahədə beynəlxalq rəqabət qabiliyyətini təmin etməkdə əsas rol oynayacaq.

Yeni mərkəzin adı Bernard Arnault Riyaziyyat və Əsas Elmlər İnstitutu olacaq. Məktəbin məlumatına görə, burada təxminən 400 fakültə tədqiqatçısı, doktorant və postdoktorant fəaliyyət göstərəcək. Riyaziyyatçılar, fiziklər, kompüter alimləri və tələbələr elmi və ictimai çağırışlar üzərində birlikdə işləyəcəklər.

Bernard Arnault yaydığı bəyanatda qeyd edib: “École Polytechnique mənim üçün ölkəmizin akademik və elmi mükəmməlliyini təmsil edir. Riyaziyyat və Əsas Elmlər İnstitutunun yaradılmasına töhfə verməkdən qürur duyuram. Bu məktəbdə və qəbul imtahanlarına hazırlıq dövründə intellektual dəqiqliyi öyrəndim və sahibkar kimi karyeramı yönləndirən viziyanı inkişaf etdirdim. Riyaziyyatın və əsas elmlərin dünyanı necə formalaşdıra biləcəyini, xüsusən də böyük sosial problemlərin həllinə töhfə verəcəyini bilirəm.”

Bu sərmayə institutun inşasına və gələn ildən başlayacaq beynəlxalq səviyyəli riyazi rezidentura proqramının işə salınmasına dəstək olacaq. Həmçinin, konfranslar və tematik semestrlər təşkil ediləcək. Riyaziyyatla bioloqiya, materialşünaslıq, kompüter elmi və fizika kimi sahələr arasında innovativ qarşılıqlı layihələr hazırlanacaq.

École Polytechnique-in prezidenti və baş direktoru Laura Şobard bildirib: “Ali təhsil və tədqiqat sahəsində qlobal mühitdə Fransa riyazi mükəmməlliyi ilə seçilməyə davam edir. Bu fənn texnoloji müstəqilliyimizin əsasını təşkil edir və süni intellekt, kvant texnologiyaları, kibertəhlükəsizlik kimi strateji sahələri dəstəkləyir. Bernard Arnault-un misilsiz dəstəyi sayəsində institut École Polytechnique-i aparıcı beynəlxalq riyazi tədqiqat mərkəzinə çevirəcək, ən yaxşı istedadları cəlb edəcək və sabahın texnologiyalarını formalaşdıracaq kəşflərə şərait yaradacaq.”

Arnault-un töhfəsi 2024-cü ildə Fondation de l’École Polytechnique tərəfindən məktəbin gələcək inkişafını dəstəkləmək məqsədilə başlanan 200 milyon avroluq maliyyələşdirmə proqramının bir hissəsidir. Bu fonda həm məktəbin məzunları, həm də 20 böyük fransız şirkəti dəstək verir.

Fransa özünəməxsus ali məktəbləri bitirənlərin getdikcə artan sayda xaricdə fəaliyyətə başlaması ilə üzləşir. Tədqiqat imkanlarına sərmayə isə ölkənin gələcək rəqabət qabiliyyəti üçün vacibdir.

Fédération Syntec və Ipsos bva tərəfindən ötən il yayımlanan araşdırmaya görə, hər il Fransanın mühəndislik və idarəetmə məktəblərinin 15 min gənc məzunu karyeralarına xaricdə başlayır. Bu isə Fransız dövlətinə ildə təxminən 1 milyard avro itkiyə səbəb olur.