NATO baş katibi Mark Ryutte bildirib ki, alyansın iyulun 7-8-də Ankarada keçiriləcək zirvə görüşündə müdafiə sənayesi əməkdaşlığı və innovasiyası əsas mövzu olacaq. O, Türkiyənin NATO-nun sənaye bazasında getdikcə artan rolunu yüksək qiymətləndirib.

Atlantik Şuranın tədbirində çıxış edən Ryutte deyib ki, bu görüş ötən il Haaqa zirvəsində verilmiş öhdəliklərin icra olunduğunu nümayiş etdirəcək. O bildirib: “Ankarada dünyanın görülən işləri müşahidə etməsini təmin edəcəyik.”

Ryutte əlavə edib ki, zirvə görüşündə “NATO 3.0” konsepsiyasına diqqət ayrılacaq. Bu, güclü alyans daxilində daha möhkəm Avropa dayağının yaradılması deməkdir. O, Haaqa görüşündə 2035-ci ilə qədər ÜDM-in 5 faizinin müdafiəyə yönəldilməsi qərarını tarixi adlandırıb.

NATO baş katibi qeyd edib ki, Avropa müttəfiqləri və Kanada 2016-2026-cı illər arasında müdafiə xərclərinə əlavə 1,2 trilyon dollar yatırıb. 2025-ci ildə müdafiə investisiyalarının təxminən 20 faiz artdığını vurğulayan Ryutte büdcələrin konkret hərbi qabiliyyətlərə çevrilməsinin vacib olduğunu söyləyib.

O, müttəfiqləri istehsal və əməkdaşlıq sahəsində ciddi irəliləyişə çağırıb və bildirib: “Bizə lazım olan və inkişaf etdirməyə çalışdığımız əsl Transatlantik müdafiə sənayesi inqilabıdır.”

Ryutte Ankarada böyük müdafiə sənayesi günü keçiriləcəyini, onlarca milyard dollarlıq yeni müqavilələr, niyyət məktubları və iri layihələrin təqdim ediləcəyini diqqətə çatdırıb. O, NATO-nun sənaye bazasının Kaliforniyadan Türkiyəyə qədər uzandığını vurğulayıb.

Baş katib Türkiyədə təxminən 3 min müdafiə şirkətinin fəaliyyət göstərdiyini qeyd edib. Bu il o, ASELSAN-ı ziyarət etdiyini və şirkətin Türkiyənin ən böyük müdafiə elektronikası firması olduğunu bildirib. Ryutte deyib: “Onlar Türkiyənin müdafiə sənayesi inqilabını hərəkətə gətirir və bu alyansın bütün üzvlərinə fayda verəcək.”

Ryutte Rusiyanı NATO-nun hazırkı və uzunmüddətli təhlükəsi adlandırıb. Çin hərbi modernizasiyası, Şimali Koreyanın nüvə proqramı və İranın nüvə ambisiyalarını da risk kimi qiymətləndirib. NATO-nun Ukraynaya dəstəyini davam etdirəcəyini söyləyib. O, Prezident Volodimir Zelenskinin Ankarada keçiriləcək zirvədə iştirak edəcəyini əlavə edib.

NATO zirvəsi iyulun 7-8-də Ankara prezident kompleksində keçiriləcək.