Türkiyə elektrik tələbatının artımı və enerji keçidini dəstəkləmək üçün növbəti on ildə elektrik paylama şəbəkələrinə ən azı 50 milyard dollar investisiya yatırmalıdır, deyə Elektrik Paylama Xidmətləri Assosiasiyasının sədri Barış Erdeniz bildirib.

O, elektrik istehlakının artması, bərpa olunan enerji ilə inteqrasiya, elektrik nəqliyyat vasitələri, məlumat mərkəzləri, süni intellekt tətbiqləri, sənaye elektrikləşməsi və rəqəmsallaşmanın paylama infrastrukturunu strateji investisiya sahəsinə çevirdiyini vurğulayıb.

Son 12 ildə Türkiyənin elektrik istehlakı 50 faiz artaraq 361 teravatt-saat səviyyəsinə çatıb. Barış Erdenizin proqnozuna görə, 2035-ci ilədək bu göstərici 510 teravatt-saatadək yüksələcək. Quraşdırılmış güc tutumu 227 gigavata çatacaq, əlavə 104 gigavat güc tələb olunacaq.

Bu artımı qarşılamaq üçün ölkədə paylama infrastrukturunun əsaslı təkmilləşdirilməsi zəruridir. Erdeniz investisiya ehtiyacının növbəti 10 ildə ən azı 50 milyard dollar olacağını bildirib.

O, elektrik paylama şirkətlərinin 2026-2030-cu illər arasında şəbəkə investisiyaları və planlı təmir xərcləri daxil olmaqla ümumilikdə 22 milyard dollar sərmayə qoymasının gözlənildiyini söyləyib. Bu xərclər şəbəkənin modernləşdirilməsi, rəqəmsallaşma, kibertəhlükəsizlik, iqlim dayanıqlığı və bərpa olunan enerji ilə inteqrasiyaya yönələcək.

Erdeniz əlavə edib ki, ötən 12 ildə Türkiyənin paylama sektoru iqtisadiyyata təxminən 33 milyard dollar töhfə verib. O, eyni zamanda, bu dövrdə paylama şirkətlərinin özəlləşdirmə gəlirləri də daxil olmaqla, təxminən 20 milyard dollar sərmayə yatırdığını bildirib.