Türkiyənin aparıcı ağ ət istehsalçılarına bazar şəraitini pozmaq və qiymətlərin əsassız qalxmasına səbəb olmaq ittihamı ilə məhkəmə nəzarətçiləri təyin edilib. Ədalət naziri Akın Gürlek 12 iyunda açıqlayıb ki, Şenpiliç, Banvit, Erpiliç, Keskinoğlu, Gedik və Lezita daxil olmaqla 13 şirkət məhkəmə nəzarəti altına alınıb.

Səkkiz vilayətdə koordinasiya olunan əməliyyatlar nəticəsində 32 şəxs saxlanılıb. Onların arasında şirkətlərin baş direktorları, idarə heyəti sədrələri və maliyyə direktorları kimi sektorun yüksək vəzifəli rəhbərləri var.

Gürlek bildirib: “İstanbul Baş Prokurorluğunun koordinatorluğu ilə ağ ət sektorunda bazar funksiyalarının pozulması, qiymətlərin süni şəkildə artması və istehlakçı zərərinə yol açmaqda şübhəli hərəkətlərə qarşı səkkiz vilayətdə eyni vaxtda məhkəmə əməliyyatları keçirilib.”

O əlavə edib ki, araşdırma daxili işlər, ticarət və maliyyə nazirlikləri ilə sıx əməkdaşlıqda aparılır.

Məhkəmə nəzarətçisi şirkətin fəaliyyətini hüquq və əməliyyat qaydalarına uyğunluğunu izləyir. Mövcud idarəetmə orqanlarının səlahiyyətləri saxlanılır, amma əsas korporativ addımların məhkəmə nəzarətçisindən təsdiqi tələb olunur.

Türkiyə ildə təxminən 2,5 milyon ton ağ ət, əsasən toyuq istehsal edir. Bu göstərici ilə ölkə dünyada ən böyük on toyuq istehsalçısı arasında yer alır. Aylıq toyuq əti istehsalı 235 minlə 250 min ton arasında dəyişir.