London mərkəzli canlı hərrac startup-ı Tilt süni intellekt texnologiyasından istifadə edərək alıcıları uyğun canlı yayım axınları ilə birləşdirir və 26 milyon dollar yatırım toplayıb. Bu, xüsusən gənc nəsilin canlı ticarətə artan marağı ilə bağlıdır.

Şirkət çərşənbə günü açıqladığı bəyanatda bildirib ki, sərmayə yığımı "Vinted Ventures" tərəfindən dəstəklənib. Bu, "Vinted" onlayn ticarət platformasının investisiya bölməsidir və Tilt üçün ikinci əl bazarında ilk strateji investor sayılır. Beləliklə, şirkətin ümumi sərmayəsi 50 milyon dollara çatıb.

2021-ci ildə yaranan Tilt bu kapitalı süni intellekt layihələrini sürətləndirmək, komandasını genişləndirmək və yeni bazarlara çıxmaq üçün istifadə edəcək. Platforma hazırda Böyük Britaniya, İtaliya, İspaniya və Polşada fəaliyyət göstərir. Avropada demək olar ki, miqyasda işləyən yeganə böyük canlı ticarət platformasıdır.

Tilt-in baş icraçı direktoru və təsisçisi Abhi Tanendranna bildirib: "Növbəti nəsil valideynlərinin etdiyi kimi statik məhsul siyahılarına baxmayacaq, onlar videolar, söhbət və canlı qarşılıqlı əlaqə vasitəsilə hər kateqoriyada məhsul kəşf edib alacaqlar."

Abhi Tanendranna əlavə edib: "Vinted ikinci əl bazarında nələrə nail olubsa, Tilt canlı ticarətdə bunları edir. Onların dəstəyi bizim üçün həm maliyyə, həm də əməliyyat təcrübəsi baxımından güclü dəstək olacaq".

Platforma satıcılara canlı yayım keçirməyə imkan verir, süni intellekt isə alıcıları real vaxtda uyğun axınlarla birləşdirir. Əksər əməliyyatlar birbaşa canlı qarşılıqlı əlaqə ilə başlayır.

Şirkət ötən aprel "Snap" adlı süni intellekt aləti təqdim edib. Bu alət canlı videodan məhsul elanını bir saniyədən az müddətdə avtomatik yaradır.

"Snap" yayımları izləməklə məhsul siyahısını daha yüksək keyfiyyətlə yaradır, başlıqları, təsvirləri optimallaşdırır, həmçinin kateqoriya və qiymətləri daha dəqiq müəyyən edir. Alətin dəqiqlik səviyyəsinin 94,8 faiz olduğu vurğulanır.

Avropada canlı ticarət bazarı Asiyada olduğu qədər böyük olmasa da, Tilt istifadəçilər arasında artan maraq görür. İstifadəçilər platformada ortalama gündə bir saatdan çox vaxt keçirir. Ümumilikdə alış-verişin 70 faizi təkrar müştərilərindir.