Hyundai Motor Türkiyə (HMTR) avqust ayında kütləvi istehsalına başlanacaq tam elektrikli IONIQ 3 modeli ilə yanaşı, yeni batareya fabrikinin də qurulacağını açıqlayıb.

Türkiyədə təxminən 30 illik istehsal təcrübəsinə əsaslanaraq, şirkət müəssisəsinə ümumilikdə 715 milyon avro sərmayə qoyacaq. Bu vəsaitin 55 milyon avrosu xüsusi olaraq batareya fabrikinin tikintisinə xərclənəcək.

Hyundai Motor Türkiyə batareya hüceyrələrini avtomatlaşdırılmış sistemlə birləşdirərək Hyundai Mobis ilə əməkdaşlıq edəcək. Layihənin ilk mərhələsində 300-dən çox şəxs işlə təmin olunacaq.

Hybrid Motor Türkiyə Satış, Marketinq və Satış Sonrası Xidmətlər üzrə Baş İdarəçisi Murat Berkeldə bildirib ki, 1997-ci ildən bu zavodda 3,3 milyon avtomobil istehsal olunub və bu müəssisə Hyundai-nin ilk xarici istehsal obyektidir.

"İndi Hyundai Motor Türkiyə olaraq yeni batareya investisiyamızı elan etməkdən qürur duyuruq. Bu sərmayənin həm ölkəmiz, həm də Türk avtomobil sənayesi üçün böyük əhəmiyyəti var və brendimizin Türkiyə bazarında inkişafına töhfə verəcəyinə inanırıq," - deyə o əlavə edib.

Sərmayənin son mərhələsində bu il 27 min, gələn il isə 40 mindən çox batareyanın istehsal olunması planlaşdırılır. NMC batareya hüceyrələri Macarıstandan alınacaq, LFP tipli qısa məsafəli batareyalar isə Çindən təmin olunacaq.

Bu istehsal yalnız avqustdan kütləvi istehsala başlanacaq IONIQ 3 modelini dəstəkləmək məqsədi daşımır, həm də gələcək elektrikli və hibrid Hyundai modelləri üçün möhkəm infrastrukturun yaradılmasını hədəfləyir. Eyni zamanda yerli təchizatçılar sənayesinin inkişafına da dəstək veriləcək.

Batareya fabriki 30 min kvadrat metr sahəyə inşa edilir və burada 27 robot fəaliyyət göstərəcək. Qablaşdırma əməliyyatları tamamilə avtomatik rejimdə aparılacaq.

Türkiyədə ikinci dəfə yerli istehsal olunacaq elektrik modeli olan IONIQ 3 avqustda istehsal xəttindən çıxacaq və sentyabrda ölkə daxilində iki fərqli batareya və sürücü sistemli versiyalarla satışa təqdim olunacaq.