ABŞ Nümayəndələr Palatasının azlıq lideri Dövlət katibi Marko Rubionu Cape Verde qapıçısı Vozinhanın anasının ölkəyə daxil olmasına və oğlunun Dünya Kubokunda çıxışını izləməsinə icazə verməyə çağırıb.

Ana Candida Evora oğlunu izləmək üçün səyahət edə bilməyib. İspaniya ilə qolsuz bərabərliklə baş tutan oyunu izləmək üçün ABŞ-a giriş üçün viza zəmanəti ödənişinin böyük xərcə səbəb olması buna mane olub.

Yanvarda Cape Verde Donald Tramp administrasiyasının viza müddətindən artıq qalma hallarını azaltmaq üçün tətbiq etdiyi qaydalar çərçivəsində ABŞ-a daxil olmaq üçün 15 min dollara qədər zəmanət ödənişi tələb olunan ölkələr siyahısına daxil edilmişdi.

Ötən ay Vaşinqton Dünya Kuboku bileti sahibləri üçün bu tələbdən imtina etdiyini elan edib. Gələcək turnirdə “qanuni səfərlərin asanlaşdırılmasını” istədiyini deyib. Lakin həmin vaxtadək yüksək xərclər Evora'nın Atlantaya 6 min 400 km-lik səfər etməməsinə səbəb olub.

O bildirib ki, “Səyahət edib oyunu izləmək istəyirdim, amma mümkün olmadı.”

Oğlunun Dünya Kuboku səviyyəsində mübarizəsini canlı izləyə bilməməsi güclü reaksiyaya səbəb olub.

“Heç bir ana öz uşağının tarix yazdığı anı görmək fürsətini qaçırmamalıdır,” deyə Nümayəndələr Palatasının demokrat lideri Hakeem Cefriz sosial mediada yazıb.

O əlavə edib: “Mən Dövlət katibi Marko Rubiodan onun bütün imkanlarını istifadə etməsini xahiş etdim ki, o, bazar günü keçiriləcək növbəti oyuna qatıla bilsin.”

Dövlət Departamentinin rəsmisi Evora'nın viza üçün müraciət etmədiyini bildirib. Ancaq oyunçuların yaxınlarının viza zəmanəti ödənişindən azad ola biləcəyini əlavə edib. Rəsmi Vaşinqtonun “bu oyunçunun ailəsi ilə fəal şəkildə əlaqə yaratdığını və viza xidmətləri ilə bağlı kömək etdiyini” söyləyib.

"Mən istəyirəm ki, o burada olsun"

Cape Verde qapıçısı Vozinha çərşənbə axşamı keçirilən ilk Dünya Kuboku oyununda İspaniyanın güclü hücum xəttini dayandırıb və bütün dünyanı heyrətləndirib. Oyunçunun əsl adı Josimar Diasdır. O, oyunun sonunda göz yaşlarını saxlaya bilməyib.

Sonradan jurnalistlərə verdiyi açıqlamada Vozinha duyğularının səbəbinin anasının onun qəhrəmanlığını şəxsən izləyə bilməməsi və viza problemi olduğunu deyib.

O bildirib: “Anam da viza səbəbindən burada ola bilmədi. Viza üçün pul vaxtında yetişmədi və mən istəyirəm ki, o burada olsun.”

Turnirin ilkin mərhələləri miqrasiya problemləri ilə yadda qalıb. Somali hakimi Omar Artan Dünya Kuboku matçlarını idarə etmək üçün ABŞ-a daxil olmaqdan qadağan olunub.

İranın bəzi komanda heyəti üzvlərinə də ABŞ vizası verilməyib. Bu ciddi tələblər səbəbindən komanda bazasını Meksikaya köçürüb.

Dünya Kubokunda kiçik ölkələr üçün səyahət, yaşayış və bilet xərclərinin yüksək olması turniri izləmək istəyənlər üçün də problem yaradıb, deyə Cape Verde milli futbol federasiyasının prezidenti Mario Semedo bildirib.

O, Reuters-ə açıqlamasında deyib: “Cape Verde sakini üçün Dünya Kubokuna səyahət etmək asan deyil. Təyyarə bileti, yaşayış və oyunun biletləri böyük xərclər tələb edir.”

Mario Semedo əlavə edib: “Miqrasiya məsələlərini idarə etmək və eyni zamanda dəstəkçilərin səfər edə bilməsi üçün şərait yaratmaq yolları mütləq var. Məsələn, bir oyunçunun ailə üzvü turnirdə iştirak etmək istəsə, bunun mümkün olması üçün hər cür səylər göstərilməlidir.”