Türkiyədə may ayı sonuna elektrikli avtomobillərin sayı 436 min 474-ə çatıb, bunu Türkiyə Statistika İnstitutu (TÜİK) açıqlayıb.

Bu göstərici ölkədə ümumi qeydiyyatdan keçmiş avtomobillərin 2,5 faizinə bərabərdir.

Artım əvvəlki illərlə müqayisədə əhəmiyyətli dərəcədə sürətlənib. 2011-ci ildə elektrikli avtomobillərin sayı cəmi 24 ədəd olub. Bu rəqəm 2019-cu ildə ilk dəfə 1000-i keçib və 2022-ci ildə təxminən 15 minə çatıb. 2024-cü ildə bu say 183 min 776, 2025-ci ildə isə 370 min 591 olub.

Hibrid avtomobillərdə də oxşar artım müşahidə olunur. May ayında onların sayı 825 min 189-a çatıb və ümumi avtomobillərin 4,6 faizini təşkil edir. Hibrid avtomobillərin sayı 2011-ci ildə 23 ədəd, 2019-cu ildə 14 min, 2022-ci ildə 135 min, 2024-cü ildə 391 min, 2025-ci ildə 697 min olub.

May ayının sonuna olan məlumata görə, Türkiyədə ümumi qeydiyyatdan keçmiş sərnişin avtomobillərinin sayı 17 milyon 790 min ədəd təşkil edir. Onların 32,2 faizi dizel, 31 faizi benzinlə işləyən, 29,5 faizi isə LPG ilə hərəkət edir.