İsrail hökuməti əl-Həddadı “7 oktyabr qırğınının memarlarından biri” kimi xarakterizə edib.

İsrailin Baş naziri Benyamin Netanyahu (Benjamin Netanyahu) və müdafiə naziri İsrael Kats (Israel Katz) birgə bəyanatda bildiriblər ki, əl-Həddad “minlərlə İsrail vətəndaşının və İsrail Müdafiə Qüvvələri əsgərinin öldürülməsi, girov götürülməsi və yaralanmasına görə məsuliyyət daşıyıb”.

BBC-yə danışan üç şahidin sözlərinə görə, Qəzza şəhərində yerləşən “Əl-Mutəz” yaşayış binası eyni anda iki fərqli istiqamətdən atılan üç raketlə vurulub, daha sonra isə ərazidən uzaqlaşan avtomobil hədəfə alınıb.

Atəşkəs elan olunmasına baxmayaraq, İsrailin Qəzza üzərində növbəti hava zərbəsi həyata keçirdiyi bildirilir.

Qəzza şəhərinin mərkəzində yerləşən yaşayış binasına endirilən zərbə nəticəsində güclü yanğın baş verib.

Şahidlərin sözlərinə görə, xilasedicilər hadisə yerinə çatsalar da, yaralıların təxliyəsində ciddi çətinliklərlə üzləşiblər. Bir neçə yaralının binadan çıxarıldığı qeyd olunur.

Hadisə yerindən uzaqlaşan avtomobili hədəf alan ikinci hava zərbəsi nəticəsində isə, şahidlərin və yerli mənbələrin məlumatına görə, üç nəfər həlak olub.

Mənbələr həmin avtomobildə ilkin zərbə zamanı ağır yaralanan əl-Həddadın daşındığının ehtimal edildiyini bildiriblər.

Şahidlər və yerli mənbələr qeyd ediblər ki, silahlı HƏMAS üzvləri mülki şəxslər kimi davranaraq ağır yaralı şəxsi binanın yan girişindən çıxarıb avtomobilə yerləşdiriblər.

Onların sözlərinə görə, avtomobil yaşayış binasından təxminən 1,5 kilometr uzaqlıqda vurulub.

İsrailin yüksək vəzifəli təhlükəsizlik rəsmisi ilkin məlumatların əl-Həddadın uğurla hədəfə alındığını göstərdiyini bildirib.

Qəzzada atəşkəs 10 oktyabrda qüvvəyə minib, lakin İsrail o vaxtdan bəri Fələstin ərazisində müntəzəm hava zərbələri endirir.

HƏMAS İsraili atəşkəs şərtlərini pozmaqda və mülki şəxslərə hücum etməkdə ittiham edir. İsrail hökuməti isə HƏMAS üzvlərini hədəfə almaq hüququna malik olduğunu bildirir.

Digər tərəfdən, İsrail HƏMAS-ı atəşkəs razılaşmasını pozmaqda və silahsızlanmaqdan imtina etməkdə günahlandırır.

ABŞ-nin rəhbərliyi ilə irəli sürülən sülh təşəbbüsləri İranla müharibənin başlanmasından sonra dayanıb və planın növbəti mərhələləri hələ qüvvəyə minməyib.

ABŞ yanvar ayında Qəzzanın idarəçiliyinin keçid dövründə texnokratik model əsasında həyata keçirilməsini, həmçinin ərazinin silahsızlaşdırılması və bərpasını nəzərdə tutan planın ikinci mərhələsinin başlanacağını elan edib.

Lakin silahsızlanma ilə bağlı danışıqlar dalana dirənib. HƏMAS polis qüvvələrini yenidən fəallaşdıraraq bölgədə hakimiyyətini bərpa etməyə çalışır.

Netanyahu və Kats bildiriblər ki, əl-Həddad ABŞ prezidenti Donald Trampın (Donald Trump) rəhbərliyi altında HƏMAS-ın silahsızlaşdırılması və Qəzza zolağının demilitarizasiyası ilə bağlı razılaşmanın icrasından imtina edib.

Onlar əlavə ediblər: “Biz 7 oktyabr qırğınında iştirak edən hər kəsə qarşı qətiyyətli və güclü şəkildə hərəkət etməyə davam edəcəyik”.

İki ildən artıq davam edən Qəzza müharibəsi 7 oktyabr 2023-cü ildə HƏMAS-ın İsrailin cənubuna hücumu ilə başlayıb. Həmin hücum nəticəsində təxminən 1 200 nəfər ölüb, 251 nəfər girov götürülüb.

İsrail buna cavab olaraq HƏMAS-a qarşı genişmiqyaslı hərbi əməliyyata başlayıb. HƏMAS-ın nəzarətində olan səhiyyə nazirliyinin məlumatına görə, bu müddətdə 72 744-dən çox insan həlak olub. Atəşkəsdən sonra isə daha 857 nəfər ölüb.