Almaniyada yaşayan türkiyəli ultramarafonçu Arda Saatçi Kaliforniyada yerləşən Ölüm Vadisindən başlayaraq Santa Monica körpüsünə qədər 600 kilometrlik ultramarafon sınağını 123 saat, 21 dəqiqə və 10 saniyəyə başa vurub.

28 yaşlı idmançı marşrutu Kaliforniyanın Ölüm Vadisi Milli Parkındakı Badwater Basin-dən başlayaraq Los Anceles yaxınlığında tamamlayıb. Marşrut sınaq zamanı edilən yan marşrut və dəyişikliklər səbəbindən 604,5 kilometrə çatıb.

Sınaq onlayn yayımlanıb və sosial mediada böyük diqqət çəkib. Instagram-da 2 milyondan çox izləyicisi olan Saatçi beş gün davam edən qaçışda YouTube-da təxminən 1,5 milyon izləyici toplayıb.

Saatçi əvvəlcə bu məsafəni 96 saat ərzində qət etməyi planlaşdırıb və məqsədini sosial mediada açıqlamışdı. Lakin 96 saatdan sonra 458 kilometr məsafə qət etmişdi. Canlı yayımdə məyusluğunu ifadə etsə də, dayanmayacağını və “hər nə olursa olsun” finişə çatacağını bildirib. O, bunun səbəbini anasının finishdə onu gözləməsi və Ana Günü münasibətilə birlikdə dondurma yemək haqda verdiyi vədi ilə əlaqələndirib.

Marşrut boyunca tamaşaçılar saatçi ilə bir neçə hissədə birlikdə qaçıb və ona dəstək olublar.

Santa Monica körpüsündə minlərlə dəstəkçi Saatçini qarşılayıb. Burada Türkiyə yığmasının sabiq futbolçusu Hamit Altıntop ona Kenan Yıldızın imzalı Türkiyə yığması forması hədiyyə edib. Türkiyə millisinin kapitanı Hakan Çalhanoğlu isə qaçış zamanı video zənglə dəstək verib.

Finişi keçdikdən sonra Saatçi bildirib: “Bu qədər çox insanın burada olması inanılmazdır. Onlayn izləyən hər kəsə və burada mənə dəstək olanlara təşəkkür edirəm. İşlər həmişə istədiyimiz kimi alınmır, amma yenə də arzularınıza doğru davam edin. Heç kəsi özünüzlə müqayisə etməyin. Əhəmiyyətli olan öz yolunuzu tapmaq və o yolla getməkdir.”

Arda Saatçi 6 sentyabr 1997-ci ildə Berlində doğulub və Almaniyada yaşayan ultramarafonçu və məzmun yaradıcıdır.