Taylandda yeniyetmə Bankokun kənarında yerləşən məktəbdə ən azı altı nəfəri öldürüb, sonra isə özünə qəsd edib. O, əvvəlcə nənə və babasını qətlə yetirib. Bu, ölkədə 2022-ci ildən bəri ən dəhşətli silahlı hücum sayılır.

Tayland polisi cümə günü bildirib ki, atışma zamanı yeddi nəfər həlak olub, 15 nəfər yaralanıb.

Polis həmçinin təsdiqləyib ki, iddia olunan silahlı şəxs atışmadan öncə nənə və babasını öldürüb.

Hadisə Nonthaburi əyalətinin Bang Kruai rayonunda yerləşən nüfuzlu Debsirin Nonthaburi məktəbində baş verib.

Daxili işlər nazirliyinin daimi katibi Arsit Sampantharat bildirib ki, iddia olunan silahlı şəxs, tələbə, atışma barədə xəbər yayıldıqdan sonra binada qalıb.

Hadisədən təxminən bir saat sonra yayılan görüntülərdə insanlar məktəbin ətrafında bir-birlərinə dəstək olur, polis və təcili tibbi yardım əməkdaşları isə binanın içərisindədir. Məktəb mühafizə altına alınıb, lakin rəsmi şəxslər hücum edən şəxsin vəziyyəti haqda məlumat verməyib.

Bir şahid jurnalistlərə deyib ki, atışma səsləri eşidiləndən sonra tələbələr başqa binadakı sinifdə gizlənib, polis əməkdaşları qapını döyərək onları təhlükəsiz şəkildə çıxarıb.

Rayon hakimiyyətləri məlumat verir ki, 2025-ci tədris ilində məktəbdə təxminən 3100 şagird və 147 müəllim çalışıb.

Məktəb Tayland kraliyet ailəsi tərəfindən yaradılan Debsirin şəbəkəsinin tərkib hissəsidir. Məktəbin məzunları arasında baş nazirlər, alimlər və yazıçılar var.

Reuters və Associated Press-in məlumatları əsasında