Prezident Vladimir Putin hücumlar qarşısında kifayət qədər qorunmayan kritik infrastruktura Rusiya dövlətinin müvəqqəti nəzarət etməsi üçün fərman imzalayıb.

Bazar ertəsi yayılan fərmanla Moskva, obyektlərin təhlükəsizliyini təmin etmədikləri və ya zədələri tezliklə təmir etmədikləri halda, onların fiziki və maliyyə nəzarətini əlindən almaq imkanı əldə edir. Bu addım Ukraynanın Rusiya infrastrukturu əleyhinə intensiv dron kampaniyası ilə əlaqədardır.

Fərmana əsasən, mülkiyyət hüquqları Rusiyanın Dövlət Mülkünün İdarə Edilməsi Federal Agentliyinə və ya göstərilən digər orqana keçəcək. Həmin orqan obyektin təhlükəsizliyinə cavabdeh olacaq və aktivlərin inventarizasiyasını apara biləcək.

Qanun yanacaq və enerji obyektləri, o cümlədən nüvə enerji istehsalı, sənaye, rabitə, nəqliyyat və logistika, kommunal xidmətlər, eləcə də dövlət təhlükəsizliyi və iqtisadi sabitlik üçün vacib sayılan digər obyektləri əhatə edir.

Rusiya 2022-ci ilin fevralında Ukraynaya genişmiqyaslı işğal başladıb. Şərqi Ukraynadakı cəbhə xətti zəiflədikcə münaqişə dron və raket zərbələri ilə daha çox xarakterizə olunur.

Kiyev uzunmənzilli dron hücumlarında uğurlar qazanıb. Xüsusən Rusiyanın enerji infrastrukturu hədəfə alınaraq bir çox bölgədə yanacaq çatışmazlığı yaranıb. Bu, həm ölkənin iqtisadiyyatına, həm də ictimai rəyə təsir göstərir.

Kiyev həmçinin Rusiyanın ən böyük onlayn pərakəndə satış şirkəti olan Wildberries ə məxsus ən azı 24 anbarı vuraraq onların böyük hissəsini məhv edib. Bu, ölkədə fəaliyyət göstərən şirkətlərə milyardlarla dollar zərər verib.

Rusiyanın ikinci ən böyük onlayn pərakəndə satış şirkəti Ozon bazar ertəsi cənub Rusiyada yerləşən dörd logistika mərkəzinin zərər gördüyünü açıqlayıb.

Eyni gündə, "Reuters" agentliyinin məlumatına görə, Rusiya Perm neft emalı zavodunu işini dayandırmağa məcbur olub. Bu əsas emal müəssisəsinə son aylarda Ukrayna dronları dəfələrlə zərbə vurub.

Ötən həftə baş verən hücum əsas emal bölmələrində ziyan yaradıb. Təmir işlərinin iki həftə davam edəcəyi gözlənilir və bu isə bəzi bölgələrdə yanacaq çatışmazlığını artıracaq.