Meteorologiya Bürosu rəsmi olaraq El Niño fenomenini elan edib. Bu hadisə Avstraliyada daha isti və quru şəraitin yaranması ilə bağlıdır və tropik Sakit Okeanında artıq sabitləşib.

Büro xəbərdarlıq edib ki, iqlim dəyişikliyi Avstraliyada yüksək istilik və meşə yanğınları riskini gücləndirəcək.

Yeniləmədə El Niño-nun artıq “tropik Sakit Okeanda baş verdiyi” bildirilib, çünki atmosfer orta səviyyədən yüksək dəniz səthinin temperaturuna reaksiya verir.

BoM vurğulayıb ki, şərqdən qərbə əsən ticarət küləkləri zəifləyir və təzyiq, bulud nümunələri El Niño ilə uyğunlaşır.

Büro güclü və ya çox güclü hadisənin ehtimal olunduğunu bildirib, lakin səviyyənin “mütləq Avstraliya iqliminə ciddi təsir demək olmadığını” əlavə edib.

El Niño hadisələrinin gücü tropik Sakit Okeanın müəyyən bölgəsində dəniz səthinin temperaturunun uzunmüddətli orta səviyyədən nə qədər yüksək olmasına əsaslanır.

Büro keçmiş El Niño hadisələrinin xüsusilə Avstraliyanın şərq hissəsində qış və yazda az yağış, cənubda isə yüksək gündüz temperaturu və açıq göy üzündən don təhlükəsinin artması ilə üst-üstə düşdüyünü qeyd edir.

Büro əlavə edib ki, “qlobal isinmə şəraitində keçmiş nümunələr gələcək təsirləri proqnozlaşdırmaqda daha az etibarlıdır”.

El Niño dünyada ekstremal hava şəraitinə təsir edir və Avstraliyada meşə yanğınları ilə Böyük Bariyer Rifində koral ağarması riskini artırır.

Meteorologiya Bürosunun uzaq proqnoz üzrə texniki rəhbəri Felicity Gamble deyib: “Okeanlarda qeyri-adi istilik səbəbindən misli görünməmiş şəraitdayıq”.

O bildirib ki, tropik Sakit Okeanın dəniz temperaturu son aylarda sürətlə artıb və büro atmosferin buna cavab verdiyini təsdiqləməyi gözləyirdi.

“Biz bu hadisənin 1,5 dərəcə daha isti dünyada baş verdiyini görürük və okeanlarda misli görünməmiş istiliklərin yaşanacağı ehtimalı yüksəkdir.

“İqlim dəyişiklikləri istilik və yanğın kimi təsirləri gücləndirəcək. Son aylarda kifayət qədər yağış olduğu üçün başlanğıc vəziyyətimiz çox pis deyil.”

ABŞ Milli Okean və Atmosfer İdarəsi və Yaponiya Meteorologiya Agentliyi artıq El Niño-nu rəsmən elan edib, amma bu qurumlar Meteolociya Bürosundan fərqli metod və hədlərdən istifadə edir.

İqlim mütəxəssisləri xəbərdar edir ki, El Niño ilə bağlı hava ekstremalları qlobal istiləşmə səbəbindən daha güclü olur, daha isti hava, sərt quraqlıqlar və ağır sellər müşahidə edilir.

Ekspertlər bildirir ki, gələn il planet üçün rekord səviyyədə isti il ola bilər.

İqlim Şurası El Niño ilə fosil yanacaqlardan çıxan istixana qazlarının Avstraliya üçün təhlükəli ikiqat təhdid yaratdığını vurğulayıb.

Şuranın baş icraçı direktoru Amanda McKenzie bildirib: “İqlim çirklənməsi və El Niño-nun birgə təsiri çoxlarımız üçün ağır olacaq”.

“Bir çox fermer artıq quraqlıqla mübarizə aparır, şəhərin kənarındakı yaşayış yerləri isə təhlükəli yanğınlara daha çox məruz qalır.”