Dünyada xəbərlərə inam rekord səviyyədə aşağı düşüb. Bu, Reuters İnstitutunun illik hesabatlarının başladığı 2015-ci ildən bəri ən aşağı göstəricidir.

Çərşənbə axşamı dərc olunan tədqiqat dünya üzrə ictimai etimadın 37 faiz olduğunu, keçən ilin eyni dövrü ilə müqayisədə 3 faiz azaldığını göstərir. Böyük Britaniyada bu göstərici 5 faiz aşağı düşərək, hazırda 30 faiz səviyyəsindədir və 10 il əvvəlkindən 20 faiz azdır.

Sorğuda iştirak edənlərin yarıdan çoxu xəbərləri üçüncü tərəf platformalarından, o cümlədən sosial media və video şəbəkələrindən aldığını bildirsə də, oxşar sayda şəxs hələ də xəbər saytları və televiziya xəbərlərini izləyir. Böyük Britaniyada ənənəvi mənbələr daha çox üstünlük təşkil edir.

İnstitutun məlumatında qeyd olunub: "Məlumatlarımız göstərir ki, auditoriyada narahatlıq, marağın azalması və kinayəçilik müşahidə olunur. Çoxları nəşriyyatların uzunmüddətli mövzuları – miqrasiya, inflyasiya və beynəlxalq münaqişələri işıqlandırma tərzindən narazıdır."

AI çatbotları

"Hesabat həmçinin yeni mənbələrə və formatlara açıq münasibətin, eləcə də ən yaxşı xəbər mənbələrinin təqdim edə biləcəyi dəyərə inam olduğunu göstərir."

Daha çox insan xəbərlərə sosial media vasitəsilə daxil olsa da, bu formatdakı inam ümumi xəbərlərə nisbətən xeyli aşağı, 22 faiz səviyyəsindədir.

İştirakçıların cəmi 10 faizi xəbər tələbatlarının əksəriyyətinin yaradıcılar və influencerlər tərəfindən qarşılandığını bildirib. Bu isə onların ənənəvi medianı əvəz etmədiyini, tamamladığını göstərir.

Respondentlər arasında dünya üzrə AI çatbotlarına inam 20 faizdir. Həftəlik istifadəsi isə 7 faizdən 10 faizə yüksəlib, xüsusilə 35 yaşdan aşağı şəxslər arasında bu göstərici 16 faizə çatıb.

Ədalətli xəbərlərə dəstək hələ də yüksəkdir və xəbər istehlakı dəyişikliklərindən demək olar ki, təsirlənməyib. 2020-ci ildən bəri bu göstəricidə 3 faiz azalma müşahidə olunub.

ABŞ-da xəbərlərə inam 25 faizdir. Siyasi baxımdan sağçı amerikalılar arasında isə inam daha aşağı, 15 faiz səviyyəsindədir.

Bəzi böyük xəbər mənbələri ciddi inam itkisi yaşayıb. "CBS News" və "Fox News"ə inam 2025-ci ildən 10 faiz aşağı düşüb, "CNN"də isə 6 faiz azalma qeydə alınıb.

İnternetdə xəbər videoları indi hər yerdə əsas informasiya mənbəyidir. Dünya üzrə 77 faiz həftəlik onlayn xəbər videosu izləyir. Hesabatda yer alan bütün bazarlarda əksəriyyət onlayn xəbər videosunu izləyir. Bu, Almaniya, Danimarka və Niderland istisna olmaqla, hər yerdə yayımlanan televiziya xəbərindən daha populyardır.

Hesabatda bildirilib: "Yaradıcıların və onlayn videonun populyarlığı insanların xəbər istəməyəcəyi anlamına gəlmir. Əksinə, insanlar xəbərdən daha əlçatan, anlaşılan və həyatlarına uyğun olmasını istəyirlər."

Nəticələr 48 bazarda təxminən 100 min nəfərin iştirakı ilə onlayn sorğu əsasında əldə olunub.