Hindistanın əfsanəvi vuran oyunçusu Sunil Gavaskar və İngiltərənin ən uzun müddət kapitanlıq etmiş Sir Alastair Kuk da daxil olmaqla keçmiş kriket kapitanlarından ibarət qrup, Pakistanın sabiq baş naziri İmran Xanın həbsdə düzgün tibbi xidmət göstərilməsini istəyib.

Kriketdən siyasətə keçən İmran Xan 2023-cü ildən etibarən korupsiya ittihamları ilə həbsdədir və bu ittihamları rədd edir.

Pakistanın hazırkı rəhbəri Şahbaz Şərifə yazdıqları məktubda 21 keçmiş kapitan Xan 73 yaşında olduğunu və keçən həftə dövlət təyin etdiyi tibbi heyət tərəfindən müayinə olunmasına baxmayaraq, ona "yalnız bir neçə saat" xəstəxanada qalmağa icazə verildiyini bildiriblər.

Xanın partiyası Ali Məhkəmənin əmrinə baxmayaraq onun şəxsi həkimlərinə giriş təmin edilməməsi səbəbindən hökumətə qarşı haqsızlıq iddiası qaldırıb.

Keçmiş kriket kapitanları məktubda üç tələb irəli sürüb: Xan xüsusilə sağ gözündəki görmə itkisi ilə bağlı Pakistan Ali Məhkəməsinin təyin etdiyi və şəxsi həkimlərinin də daxil olduğu tibbi heyət tərəfindən qiymətləndirilməlidir.

Onlar həmçinin məhkəmə qərarına əsasən, Xan ailəsinin həftəlik ziyarətlərinə "aramsız və inzibati gecikmələr olmadan" imkan yaradılmasını istəyiblər.

Son olaraq, tibbi heyətin tövsiyə etdiyi müalicə gecikmədən təmin edilməlidir.

Keçmiş Avstraliya kapitanı Qreq Çappell tərəfindən hazırlanan məktubda deyilir: "İmran Xan 73 yaşındadır və artıq üç ildən çoxdur həbsdədir. Onun işi ilə bağlı hüquqi və siyasi arqumentlər nə olursa olsun, məhkəmə tərəfindən göstəriş verilmiş tibbi prosedurun tamamlanmasının təmin edilməsi mübahisəli tələb deyil."

Məktubda İngiltərədən Maykl Etırton, Maykl Brierli, Nasser Hüseyn, Endryu Strauz və Deyvid Guver, Hindistandan Kapil Dev və Dilip Vengsarkar, Avstraliyadan isə Belinda Klark, Adam Gilkrist, Stiv Vau və Kim Hyuqsun imzaları yer alıb.

Fevral ayında 14 keçmiş kapitan da İmran Xan üçün "insani müalicə və düzgün tibbi yardım" çağırışını dəstəkləmişdi.

O dövrdə Xanın vəkili onun sağ gözündə yalnız 15 faiz görmə qabiliyyəti qaldığını və həbsxana rəhbərliyinin tədbir görməməsi səbəbindən vəziyyətin pisləşdiyini bildirmişdi.

Hər iki məktubun imzacıları özlərini "kriket meydanında qurulan əlaqəni bölüşən keçmiş həmkarlar və rəqiblər" kimi təqdim edib, bu əlaqənin "ölkələri tez-tez bölən sərhədlər və münaqişələri aşdığını" vurğulayıblar.

İmran Xan əvvəllər Pakistan milli kriket komandasının kapitanı olub, 2018-2022-ci illərdə isə Pakistanın baş naziri vəzifəsini icra edib.

O, 2023-cü ilin avqustunda tutulub və dövlət sirlərinin açıqlanmasından dövlət hədiyyələrinin satılmasına qədər 100-dən çox iş üzrə ittihamlarla üzləşir. İmmran Xan və partiyası Pakistan Təhrik-e-İnsaf bu ittihamların siyasi məqsəd daşıdığını bildirir.

Onun həbsinə tərəfdarları etiraz aksiyaları keçirib, lakin hökumət güclü müdaxilə edib.

Pakistan Ali Məhkəməsi çərşənbə günü hökumətə Xanı özəl xəstəxanaya köçürtmək barədə göstəriş verib.

Lakin İmran Xan İslamabadda dövlət xəstəxanasında həkimlər tərəfindən müayinə olunub, "tibbi cəhətdən sağlam" sayıldıqdan sonra yenidən həbsxanaya qaytarılıb.