Vyetnamda polis Ho Şi Min şəhərində pişik əti ticarəti ilə məşğul olan cinayət şəbəkəsini ifşa edərək 400-dən çox oğurlanmış pişiyi ələ keçirib, heyvan hüquqları təşkilatları və yerli mətbuat məlumat verib.

Qruplar bildirir ki, keçən həftə çoxgünlük əməliyyatdan sonra xilas edilən pişiklərin 40-dan çoxu sahibləri ilə birləşib. Lakin bir neçə onluq pişik tapıldığı ağır şərait səbəbindən vəfat edib.

Beynəlxalq qeyri-kommersiya təşkilatı Humane World for Animals-də itin və pişiyin ətinin istehlakına qarşı kampaniyanın rəhbəri Karanvir Kukreja çərşənbə günü yaydığı bəyanatda əməliyyatı “Vyetnamda pişik əti ticarətinin böyük miqyasına ciddi xatırlatma” adlandırıb.

Yerli mətbuatın məlumatına görə, keçən həftə Ho Şi Min şəhərində heyvan oğurluqları ilə bağlı araşdırmalar polisə pişik əti cinayət şəbəkəsini tapmaq və doqquz nəfəri həbs etmək imkanı verib.

Ho Şi Min şəhər Cinayət Polisi Bölməsi bildirir ki, 45 qəfəsdə təxminən 400 sağ pişik və buzla doldurulmuş dörd köpük konteynerdə 80 ölü pişik aşkar edilib. Başqa yerdə isə 21 sağ pişik tapılıb.

Polis qeyd edib ki, şübhəlilər son üç il ərzində Ho Şi Min, Tay Ninh və An Giang bölgələrində pişikləri tutub topladıqlarını etiraf ediblər.

Karanvir Kukreja deyib ki, Vyetnamda küçələrdən heyvan oğurlayan və ailə heyvanlarını insan istehlakı üçün kəsən cinayətkarlar milyonlarla heyvana zərər vurur.

Qeyri-kommersiya təşkilatı Vietnam Cat Welfare-dən Chris Gindelhumer xilas edilən heyvanların baxımı ilə məşğul olur. O, son günlər çox göz yaşı gördüyünü söyləyib.

Gindelhumer bildirib: “Çoxsaylı Vyetnam ailələrinin pişiklərini axtarmağa gəlməsini görmək çox gözəldir. Amma həm də ürəkparçalayıcıdır, çünki bir çox ailə pişiklərini tapmaqda çətinlik çəkir.”

O, əlavə edib ki, çoxlu baytar həkimlər və könüllülər pişiklərin sağlamlığı üçün fasiləsiz işləyirlər.

Vyetnamda itin və pişiyin ətinin istehlakı qanunidir. Satıcılar heyvanların mənşəyini təsdiqləyən icazəyə malik olmalıdırlar. Amma Mərkəzi Vyetnamda yerləşən Hoi An kimi bəzi şəhərlər qlobal heyvan hüquqları təşkilatları ilə birgə itin və pişiyin ətinin istehlakının qarşısını almağa çalışırlar.

Cənubi Koreyanın 2024-cü ildə itin ətinə qadağa qoymasından sonra Vyetnam rəsmiləri bildiriblər ki, hökumət ev heyvanları və sahiblərinin hüquqlarını daha yaxşı qorumaq üçün qanunvericilikdə islahatları planlaşdırır.