Disney Federal Rabitə Komissiyasına (FCC) qarşı ABC-yə məxsus və idarə etdiyi stansiyaların lisenziyasının vaxtından əvvəl yenilənməsinin qarşısını almaq üçün məhkəmə iddiası qaldırıb.

Vaşinqtonda federal məhkəməyə təqdim olunan iddianamədə media nəhəngi bu addımı ABŞ Prezidenti Donald Tramp administrasiyasının şirkəti qorxutmaq məqsədilə atdığı siyasi təzyiq kimi qiymətləndirir.

Apreldə FCC Nyu-York və Los Ancelesdəki törəmə stansiyalar daxil olmaqla şəbəkənin lisenziyalarını planlaşdırılan vaxtından əvvəl yeniləməyi tələb edib. Halbuki altı stansiyanın lisenziya müddəti hələ yarıdan çox bitməyib. Ən yaxın vaxtı tamam olacaq stansiya Şimali Karolina, Durhamdakı WTVD-dir və onun lisenziya müddəti 2028-ci ilin dekabrına kimi nəzərdə tutulub. Şəbəkə bu addımı siyasi qisas kampaniyası sayır.

İddianamədə bildirilib ki, “administrasiya dəfələrlə ABC-nin ifadə azadlığını – jurnalistlərinin yayımladığı xəbərləri və şəbəkənin proqramlarında səslənən baxışları hədəfə alıb. Vaxt keçdikcə bu hücumlar ABC-nin yayım lisenziyalarının ləğvi tələbinə qədər artır.”

Həmin sənəddə 2025-ci ildə Prezidentin Truth Social platformasında şəbəkəyə qarşı təhdidlər etdiyi, o cümlədən ABC-nin “Respublikaçılar və/və ya Mühafizəkarlar haqda ədalətsiz yayımı”na görə lisenziyasını itirməli olduğu barədə paylaşımlar etdiyi qeyd olunub.

FCC apreldə lisenziya yenilənməsi tələbini Disney-də müxtəliflik, bərabərlik və daxilolma siyasətləri, eləcə də ABC şəbəkəsinin “The View” verilişi barədə araşdırma nəticəsində irəli sürüb.

Mart ayında FCC sədri Brendan Karr yayımçılara xəbərdarlıq edərək, saxta xəbərlər yayan stansiyaların lisenziyasının əlindən alınacağını bildirmişdi. Bu, Trampın ABŞ-İsrail müharibəsi ilə bağlı İran haqda xəbərlərə əsəbiləşdiyi vaxta təsadüf edib.

Yaxın günlərdə isə Tramp ABC-dən gecə aparıcısı Cimmi Kimmelin Ağ Ev müxbirlər naharı zamanı xanım Melania Trampı “gözləyən dul” adlandırması ilə əlaqədar işdən çıxarılmasını tələb edib. Tramp bu şərhləri zorakılığa çağırış adlandırıb.

Söz azadlığı müdafiəçiləri ABC-nin məhkəmə iddiasını dəstəkləyib.

“Brendan Karr və onun FCC-sini jurnalistikaya qarşı sonsuz qorxutma və qisas kampaniyalarına görə məhkəməyə verməyin vaxtı çatıb,” - Freedom of the Press Foundation-un müdafiə direktoru Seth Stern Al Jazeeraya bildirib.

“Karr nə qədər bəhanə gətirsə də, fəaliyyətinin mahiyyəti aydındır: o, Trampın senzura tsarı kimi çalışır, vəzifəsindən yalnız Trampın mediadakı rəqiblərini hədəf almaq üçün sui-istifadə edir, saxta proseslər, hədələyici məktublar və X paylaşmaları ilə.”

Şəbəkə iddiada tezliklə məhkəmə dinləməsi və müvəqqəti qadağan tələb edib.

İddianın məlum olması Disney-in səhmlərinin səhər ticarətində 1,1 faiz qalxmasına səbəb olub.