İran bazar günü 200 milyard kubmetrdən çox təbii qaz ehtiyatı aşkar etdiyini açıqlayıb. Bu kəşf, aylar əvvəl başlayan Yaxın Şərq müharibəsinin ölkənin enerji infrastrukturuna və istehsalına vurduğu zərbəyə baxmayaraq reallaşıb.

Neft naziri Mohsen Paknejad dövlət televiziyasına bildirib ki, yeni qaz yataqları Fars əyalətinin cənubunda tapılıb. Sahədən 160 milyard kubmetrdən çox qaz çıxarılması mümkündür.

O, qazı zəhərli hidrogen sulfid qazının çox az olduğu şirin təbii qaz kimi təsvir edib. Bu isə əməliyyat və inkişaf xərclərinin aşağı olmasına səbəb olur.

"Bloomberg"in məlumatına görə, mənbədən yeni istehsalın başlanması illər çəkə bilər.

İranın enerji sektoru fevralın sonunda ABŞ və İsrailin birgə zərbələri nəticəsində zərər görüb. Bu zərbələr Yaxın Şərq müharibəsinin başlanmasına səbəb olub.

Dövlətlər İranın enerji infrastrukturuna, o cümlədən qaz istehsal obyektləri, neft anbarları və nəqliyyat dəhlizlərinə zərbələr endiriblər.