ABŞ-ın 29 ştatının baş prokurorları Meta-nı Facebook və Instagram platformalarını uşaqlar və yeniyetmələr üçün asılılıq yaradan, onların psixi sağlamlığını pisləşdirən, uşaq məxfiliyini və istehlakçı hüquqlarını pozan xüsusiyyətlərlə təchiz etməkdə ittiham edib.

Ştatlar məhkəməyə bildiriblər ki, cərimələrin ümumi məbləği təxminən 200 milyard dollar ola bilər. Lakin son məbləğ məhkəmənin qərarından və təyin etdiyi tədbirlərdən asılı olacaq.

2023-cü ildə qaldırılmış iddianın məhkəmə prosesi altı-səkkiz həftə davam edəcək.

Açılış arqumentləri zamanı Kaliforniya baş prokurorunun müavini Megan ONill deyib ki, Meta "istifadəçiləri, qanunvericiləri, müəllimləri və valideynləri aldatmaq üçün kampaniya aparıb". CNBC xəbər verib.

ONill daxili şirkət sənədlərinə istinad edib, orada "gənclər ən yaxşıdır" və "Yeniyetmələr hisslərinə baxmayaraq asılıdırlar. Instagram asılılıq yaradır" kimi qeydlər yer alır. The Guardian "Onlar bunu bilirdilər," ONill vurğulayıb. "Dəfələrlə mənfəət qələbə çaldı."

Ştatlar Meta-nı Uşaqların Onlayn Məxfiliyinin Müdafiəsi Qanunu da daxil olmaqla federal və dövlət qanunlarını, həmçinin istehlakçı hüquqlarını müəyyən edən qanunları pozmaqda suçlayırlar.

İddia olunur ki, sonsuz sürüşdürmə, avtomatik oynatma və gözəllik filtrləri kimi funksiyalar gənc istifadəçiləri daha uzun müddət platformada saxlamaq üçün qəsdən hazırlanıb.

İşin ilk günü Kaliforniya baş prokuroru Rob Bonta məhkəmənin əsasən "mülki cərimələr, bərpa və səhvlərin aradan qaldırılması" üzərində qurulduğunu bildirib. CNBC xəbər verir ki, iş əsasən zərər tələb edən müraciətdən ibarət deyil.

Bonta deyib: "Bu, zərər tələb edən iş deyil."

Meta əvvəllər iddia edirdi ki, məhkəmə işi şirkəti 1,4 trilyon dollaradək cərimə qoya bilər.

Bonta isə bu rəqəmi rədd edib, əlavə edib ki, ştat baş prokurorları məhkəməyə keçən həftə 200 milyard dolların daha real rəqəm olduğunu bildiriblər.

"Aydın olsun deyə vurğulayıram ki, biz 1,4 trilyon dollar tələb etmirik," Bonta qeyd edib. O əlavə edib ki, bu böyük rəqəm "mövcud məlumatlara əsasən hesablana biləcək ən yüksək rəqəmdir" və "bu rəqəmi Meta özü qiymətləndirib." CNBC yazır ki, Meta bu iddiaya etiraz edir.

İddia 29 ştatın baş prokurorlarının koalisiyası tərəfindən konsolidə edilmiş çoxməhkəməli iş kimi qaldırılıb. Məhkəmədə Kaliforniya, Kolorado, Kentukki və Nyu-Cersi vəkilləri prosesi aparır.

Ştatlar həmçinin struktur islahatlar tələb edir.

CNBC-nin məlumatına görə, onlar Meta-dan 13 yaşından kiçik uşaqlardan toplanmış şəxsi məlumatları, həmin məlumatlar əsasında yaradılmış alqoritmlər və modelləri silməyi, həmçinin platformadan bəzi dizayn xüsusiyyətlərini çıxarmağı tələb edirlər.

Meta iddiaları tam rədd edir. Şirkətin vəkili Pol Şmit açılış çıxışında deyib ki, ştatların vəkillərinin təqdim etdiyi daxili qeydlər və e-poçt yazışmaları kontekstdən çıxarılıb, daha geniş müzakirələrdən seçmə şəkildə götürülüb. The Guardian xəbər verib.