Müharibə başladılanda ABŞ prezidenti Donald Tramp Tehrandakı rejimdən "şərtsiz təslimiyyət" tələb etmişdi. Çərşənbə günü Versal şəhərində o, həmin rejimlə 14 maddədən ibarət Anlaşma Memorandumunu rəsmi imzaladı.

"Strateji baxımdan, müharibə İran tərəfinin xeyrinə bitir; ABŞ və İsrail indi anlayırlar ki, İranla bağlı bütün variantlar masada deyil və hərbi seçim işə yaramır," Nasr deyib. O, həmçinin bildirib ki, "İranın Hormuz boğazını ələ keçirmək və bunu dünya enerji bazarlarına və ümumdünya iqtisadiyyatına qarşı istifadə etmək bacarığı" ona "müharibədən əvvəl olmayan strateji aktiv verdi; özünü müdafiə və gələcək hücumları önləmək üçün təsir vasitəsidir".

ABŞ-İran razılaşmasından sonra İsrailin mövqeyi ilə bağlı suala Nasr cavab verib: "Nəticə qətiyyən İsrail üçün əlverişli deyil" və "ABŞ artıq İsrailin İrana yanaşma nəzəriyyəsinə inanmır və ya onu izləmək istəmir". Nasrın sözlərinə görə, "ABŞ artıq İranla müharibəni gələcək yol kimi görmür" və "İsrail xaricində bu, xüsusilə baş nazir Binyamin Netanyahunun mövqeyinə ziyandır".

İran müharibədən daha inamlı çıxır

Tramp Obama dövrü 2015-ci il razılaşmasını İrana pul verməkdə ittiham etsə də, ABŞ bu razılaşma çərçivəsində İranın dərhal neft və yanacaq satmasına icazə verəcək. Həmçinin Tehranın aktivlərini dondurmamaq və xüsusi investisiya fondu yaratmaq vəd olunub. Nasr bunu "ABŞ üçün böyük geriləmə, İran üçün böyük uğur kimi görməmək çətindir" deyə izah edib. "Hazırkı razılaşmada ABŞ müharibənin dayandırılmasına görə İrana daha çox güzəşt edir," o əlavə edib.

Nasr ABŞ prezidentinin İranda Venesuela kimi rejim dəyişikliyi baş verdiyi iddialarını yalnış sayır. Trampın "şeyləri ABŞ üçün daha əlverişli göstərməyə çalışdığını" vurğulayan Nasr bildirib: "İranda siyasi azadlıqlarda demək olar ki, dəyişiklik olmayacaq".

O yekunlaşdırıb: "İslam Respublikası daxildə və bölgədə müharibədən daha inamlı, özünə güvənən və güclənmiş şəkildə çıxır". Müharibənin ölkədə və regionda rejimi zəiflətmədiyini, əksinə "avtoritar hakimiyyətin təsirini möhkəmləndirəcəyini" diqqətə çatdırıb.