Apple onlayn hesab yaradarkən ödəyən istifadəçilərin real e-poçt ünvanlarını gizlətməyə imkan verən gizlilik funksiyasını dəyişməyi planlaşdırır. Bu, anonim qeydiyyatların bloklanmasını asanlaşdıracaq.

Apple-ın Hide My Email xidməti iCloud+ xüsusiyyətidir. O, @icloud.com domenində anonim e-poçt ünvanları yaradır və həmin mesajları istifadəçinin real elektron poçt ünvanına yönləndirir. Bu xüsusi yaradılan ünvanlar adi Apple istifadəçilərinin @icloud.com ünvanlarından fərqlənmir, ona görə də effektiv işləyir.

Şirkət bazar ertəsi günü inkişaf etdiricilərə göndərdiyi bildirişdə bildirib ki, yaxın həftələrdə anonim yaradılan elektron poçt ünvanları @private.icloud.com domeninə keçir və bu da tətbiq və saytların həmin ünvanların özəl olduğunu anlayıb istifadəçi qeydiyyatlarını bloklamasına imkan verəcək.

Apple eyni zamanda vurğulayıb ki, mövcud ünvanlar fəaliyyətini davam etdirəcək və poçtların yönləndirilməsi kəsilməyəcək. Tətbiq və poçt təminatçılarının filtrlərini yeniləməsi tələb olunacaq ki, bu xidmətdən istifadə edən müştərilərə poçtlar çatdırılsın.

Bir neçə Apple istifadəçisi Reddit-də poçt domeninin dəyişdirilməsini tənqid edib. Onlar bunun xidmətdən istifadəni çətinləşdirəcəyini qeyd ediblər.

Apple dəyişikliklə bağlı TechCrunch-ın sorğusuna cavab verməyib və səbəbini açıqlamayıb.

İlin əvvəlində TechCrunch xəbər vermişdi ki, Apple Hide My Email üzərindən anonim e-poçt yaradan bir istifadəçinin real hesab məlumatlarını açıqlayıb. Həmin istifadəçi ABŞ Federal Təhqiqat Bürosunun direktoru Kash Patelin sevgilisinə təhdid xarakterli elektron məktub göndərmişdi.

Ötən il Tramp administrasiyası anonim hesabları ifşa etmək üçün tədbirlər görmüşdü. Bu prosesdə Trampın tənqidçilərinə aid hesabları subpoena vasitəsilə şirkətlərdən istifadəçi məlumatlarını tələb etməklə açmağa çalışmışdılar.