Ümumdünya Səhiyyə Təşkilatı hantavirusun hazırda qlobal səviyyədə 10 təsdiqlənmiş halını bildirib. Əvvəl bildirilen 11 yoluxma sayı bir şəxsin virus testinin mənfi çıxması səbəbindən yenilənib.

Ümumilikdə səkkiz yoluxma laboratoriya tərəfindən təsdiqlənib, digər iki hal isə ehtimal olunan sayılır.

ÜST-nin Baş direktoru Tedros Adhanom Ghebreyesus dünya üzrə riskin aşağı olduğunu vurğulayıb. Gondius gəmisinin kapitanı və 26 nəfərlik heyəti hazırda gəmidədir və müşahidə altındadır, simptomları olan yoxdur.

Tedros inkubasiya müddətinin uzun – altı həftə – olduğunu nəzərə alaraq yaxın günlərdə daha çox yoluxma halları qeydə alına biləcəyini xəbərdarlıq edib. Səyahətçilər xüsusi mərkəzlərdə və ya evdə karantin və testdən keçiriləcək.

"Bu o demək deyil ki, virus yayılır, əksinə, idarəetmə tədbirlərinin işlədiyini, laboratoriya analizlərinin davam etdiyini və xəstələrin hökumətin dəstəyi ilə müalicə olunduğunu göstərir," deyə ÜST rəhbəri əlavə edib.

Üstəlik, ÜST Argentinada, Çilidə və Uruqvayda ekspertlərlə birgə epidemiyanın yayılmasının araşdırılması üzərində işləyir.

Hantavirus adətən yoluxmuş gəmiricilər vasitəsilə yayılır, lakin bu epidemiyanın səbəbkarı olan Andes virusu yaxın təmasda olan insanlar arasında da ötürülə bilər və bu, əsasən bağlı məkanlarda baş verir.

Xəstələrdə adətən 1-8 həftə ərzində baş ağrısı, hərarət, əzələ ağrıları və mədə-bağırsaq pozuntuları kimi simptomlar müşahidə olunur. Ağır hallarda xəstəlik sürətlə öskürək, nəfəs darlığı və ağciyərlərdə maye yığılmasına səbəb ola bilər. Hazırda xəstəliyə qarşı vaksin və ya xüsusi antiviral müalicə mövcud deyil, müalicə əsasən simptomatiktir.