Türkiyənin İnvestisiya və Maliyyə İdarəsi fəaliyyət göstərməsinin 20 illiyini qeyd etmək məqsədilə nümayəndə heyətini Çinə göndərib. Nümayəndə heyətinə rəhbərlik edən İdarənin sədri Əhməd Burak Dağlıoğlu Pekində bir sıra görüşlər keçirib.

Heyət Çin şirkətlərinin təmsilçiləri ilə İpək Yolu Fondu ilə birgə təşkil olunan görüşdə iştirak edib. Fondun məqsədi Çin tərəfindən İpək Yolu təşəbbüsünə qoşulan ölkələrdə investisiyaların artırılmasıdır.

Əhməd Burak Dağlıoğlu, Türkiyənin bu il əvvəlində Çin vətəndaşları üçün turizm məqsədilə səfərlərini 90 günədək vizasız etməsinin xatırladaraq, ilin ilk aylarında Çinli turistlərin Türkiyəyə gəlişində 37 faiz artım olduğunu bildirib.

O, bu artımın iki ölkənin bir-birini daha yaxşı tanımasına və əməkdaşlıq imkanlarının genişlənməsinə şərait yaradacağına ümid etdiyini qeyd edib.

Dağlıoğlu həmçinin iki ölkə liderlərinin yerli valyutalarla ticarətin aparılmasının əhəmiyyətinə inandıqlarını bildirib. Bu baxımdan, iki ölkənin mərkəzi bankları arasında razılaşmaya uyğun olaraq, Çin Sənaye və Ticarət Bankı (ICBC) Türkiyədə valyuta mübadiləsi əməliyyatları aparmaq üçün səlahiyyət alıb.

"Bu, ölkələr arasında iqtisadi əlaqələrin daha da dərinləşməsini asanlaşdıracaq," - deyə Dağlıoğlu əlavə edib.

O, bütün Çin şirkətlərini Türkiyədə investisiya imkanlarını araşdırmağa və onlardan yararlanmağa dəvət edib.