Britaniyanın rəqabət orqanı "Competition and Markets Authority" (CMA) "StubHub" platformasını əlavə haqları satışın son mərhələsində açıq şəkildə göstərməməkdə ittiham edərək 889 min 200 funt sterlinq cərimə tətbiq edib.

Əlavə olaraq, "StubHub" 50 min 350 müştəriyə, hər biri ortalama 10,33 funt sterlinq olmaqla, geri ödəmə həyata keçirəcək.

CMA bu araşdırmanı onlayn qiymət siyasətlərində qanunsuz və ədalətsiz təcrübələri aradan qaldırmaq məqsədilə aparıb.

Orqan "StubHub"un "drip pricing" adı verilən qanunsuz üsuldan istifadə etdiyini aşkar edib ki, bu da müştərilərin bilet qiymətlərini düzgün müqayisə etməsinə mane olur və əlavə xərclərlə gözlənilməz yük yaradıb.

2025-ci ilin 5 aprelindən 7 dekabrınadək bəzi alıcıların çatdırılma və xidmət haqları kimi məcburi xərcləri bilet alma prosesinin son mərhələsində ödəmişlər.

Lakin CMA ödənişlərin yalnız çekaut mərhələsində tətbiq olunduğunu, alış prosesinin əvvəlində isə bu haqda məlumat verilmədiyini müəyyən edib.

"StubHub"un təmsilçisi şirkətin dərhal bu təcrübəyə son verdiyini və CMA ilə əməkdaşlıq etdiyini bildirib. Şirkət qanunu pozduğunu qəbul edib və işi erkən həll etməklə cərimədə 40 faiz endirim qazanıb.

Müştərilərə qaytarılacaq vəsait avtomatik olaraq biletlərin alındığı karta geri yatırılacaq.

CMA hazırda rəqib ikincil bilet saytı "Viagogo"da gizli haqlarla bağlı araşdırma aparır və yayda yeniliklər açıqlanacaq.

Keçən ildən bəri CMA səkkiz şirkətin onlayn qiymət təcrübələrini yoxlayır. Daha əvvəl CMA-nın təzyiqi nəticəsində "Ticketmaster" də qiymət siyasətində bir sıra dəyişikliklərə getmişdir.