Threads aylıq aktiv istifadəçi sayını 500 milyonu ötüb. "Meta" çərşənbə axşamı bu göstəricinin platformanın üçüncü ildönümünə az qalmış əldə edildiyini açıqlayıb. Threads 2023-cü ildə sürətli start verərək 100 milyon istifadəçiyə daha tez çatıb və CEO Mark Zuckerberg hesab edir ki, platforma gələcəkdə 1 milyard istifadəçiyə çata bilər.

"Meta" bildirir ki, Threads-də gündəlik aktiv istifadəçilərin sayı dünya üzrə sürətlə artır. Bu artımın əsasını müxtəlif mövzular üzrə paylaşımlar etməyə imkan verən icmalar təşkil edir. Şirkət icmaları beta rejimindən çıxarır, Threads menyusunda icmalar üçün mərkəz əlavə edir və icmalara öz vizual tərzlərini verib. "Meta" hələlik hansı mövzularda xüsusi icmalar yaradılmasına qərar verir. Dekabr ayında platformada 200-dən çox icma olduğu açıqlanıb. Threads rəhbəri Konor Heyz "The Verge"yə deyib ki, istifadəçilərin öz icmalarını yaratmasına imkan vermək "bəlkə gələn il" mümkün olacaq.

Threads həmçinin istifadəçilərə alqoritmin göstərdikləri üzərində daha çox nəzarət vermək üçün yeni funksiya təqdim edir. Bu ilin əvvəlində platforma "Dear Algo" funksiyasını istifadəyə verib. Bu funksiya istifadəçilərə nə görmək istədiklərini açıq şəkildə deməyə imkan verir. Çərşənbə axşamı isə "Your Algo" funksiyasını işə salıb. Bu funksiya istifadəçilərə alqoritmdə nəyi şəxsi şəkildə dəyişmək istədiklərini bildirməyə şərait yaradır. "Your Algo" ABŞ, Kanada, Böyük Britaniya, Avstraliya və Yeni Zelandiya ölkələrində istifadəyə verilib.