Onlayn təhsil sistemi Canvas-ın sahibi olan ABŞ-lı şirkət bazar ertəsi günü təhsil platformasında tələbə və məktəb məlumatlarını oğurlayan haker qrupu ilə razılığa gəldiyini bildirib.

Instructure yaydığı bəyanatda "bu hadisədə iştirak edən icazəsiz şəxslə razılığa gəldiyini" qeyd edib.

Şirkətin sözlərinə görə, "məlumatalar bizə qaytarılıb" və "məlumataların məhv edilməsinə dair rəqəmsal təsdiq (şred hesabatları) alınıb".

Bəyanatda "Bu hadisə nəticəsində heç bir Instructure müştərisi, ictimaiyyətə və ya başqa yolla, hədə-qorxuya məruz qalmayacaq. Bu razılaşma bütün təsirlənmiş Instructure müştərilərini əhatə edir və fərdi müştərilərin icazəsiz şəxslə əlaqə qurmağa cəhd etməsinə ehtiyac yoxdur" deyilir.

Instructure ilk dəfə olaraq mayın 1-də Canvas ilə bağlı kibertəhlükəsizlik insidentini araşdırdığını bildirmişdi. Haker qrupu ShinyHunters mayın 3-də öz veb saytında etdiyi paylaşımda insidentə görə məsuliyyəti öz üzərinə götürdüyünü iddia etmişdi. ShinyHunters iddia edirdi ki, haker hücumu zamanı Canvas-dan təxminən 6,65 terabayt məlumat ələ keçirilib.

Qrup, ehtimal olunan hədə-qorxuya mayın 6-dək cavab vermədikləri təqdirdə, dünyanın demək olar ki, 9000 məktəbinə aid məlumatları yayımlayacağını bildirmişdi. Daha sonra ShinyHunters, bəzi məktəblərlə danışıqların davam etdiyini bildirərək son tarixi təxirə salıb.

Haker qrupu ShinyHunters-ın ABŞ və Böyük Britaniyada gənc yetkinlər və yeniyetmələrdən ibarət olduğu və əvvəllər onlayn satış platforması "Ticketmaster"-a qarşı həyata keçirilən haker hücumunda iştirak etməkdə təqsirləndirildiyi bildirilir.

Canvas "tam işlək və istifadə üçün təhlükəsiz olaraq qalır"

Instructure-un baş icraçı direktoru Stiv Deyli haker hücumu üçün üzr istəyib və Canvas-ın "tam işlək və istifadə üçün təhlükəsiz olaraq qaldığını" söyləyib.

"Son bir neçə gündə bir çoxunuz real çətinliklərlə, komandalarınızın gərginliyi ilə, sinif otağında əldən verilmiş anlarla, cavablandıra bilmədiyiniz suallarla qarşılaşdınız. Bizdən daha davamlı ünsiyyət gözləyirdiniz və biz bunu təmin edə bilmədik. Buna görə üzr istəyirəm" - deyə Deyli bildirib.

Deylinin sözlərinə görə, istifadəçi adları, e-poçt ünvanları, kurs adları, qeydiyyat məlumatları və mesajlar hücum zamanı zərər görən məlumatlar arasında idi.

Canvas rəqəmsal və kurs materialları üçün mərkəz, qiymətlərin qeyd olunduğu kitabça və müəllimlərlə tələbələrin bir-biri ilə danışması üçün bir platforma kimi fəaliyyət göstərir. Haker hücumu son imtahan dövründə bəzi universitetlərə təsir edib və tələbələr hücum səbəbindən Canvas platformasında tədris materiallarına daxil ola bilməyiblər. Massaçusets Universitetinin Dartmut və İllinoys Universiteti insident səbəbindən imtahanları təxirə salan müəssisələr arasında idi.