Londonda yerləşən Benchmark Mineral Intelligence analitik şirkəti aprel ayı üzrə elektrikli avtomobil satış məlumatlarını açıqlayıb. Məlumata görə, ötən ay dünya üzrə 1,6 milyon elektrikli avtomobil satılıb. Bu rəqəm illik müqayisədə 6% artıma, aylıq müqayisədə isə 9% azalmaya uyğundur.

Avropa apreldə də elektrikli avtomobil satışlarındakı artımda əsas rol oynamağa davam edib. Mart ayındakı rekord satışlardan sonra Avropada ötən ay elektrikli avtomobil satışları illik müqayisədə 27% artaraq 400 mindən çox olub. Yaxın Şərqdəki müharibə səbəbindən artan yanacaqdoldurma qiymətləri Avropada elektrikli avtomobil satışlarının artmasında təsirli olmaqda davam edib.

Dünyanın ən böyük elektrikli avtomobil bazarı olan Çində satışlar apreldə illik müqayisədə 8% azalaraq 850 minə düşüb. Bu azalmanın böyük hissəsi, ilin əvvəlində tətbiq edilən və bu modellərin cəlbediciliyini azaldan subsidiya qaydalarından mütənasib olmayan şəkildə təsirlənən kiçik avtomobil seqmentində müşahidə edilib. Daxili tələbin yavaşlaması ilə Çinin elektrikli avtomobil ixracı sürətlənib. Çin təkcə apreldə 400 mindən çox elektrikli avtomobil ixrac edib. Bu ilin ilk 4 ayında isə Çin təxminən 1,4 milyon elektrikli avtomobil ixracına nail olub. Beləliklə, Avropa, Cənubi Amerika və Cənub-Şərqi Asiya kimi bazarlarda Çin mənşəli elektrikli avtomobillərdə əhəmiyyətli artım müşahidə olunub.

Şimali Amerikada elektrikli avtomobil satışları apreldə illik müqayisədə 28% azalaraq 120 min səviyyəsində qeydə alınıb. ABŞ və Kanadada satışlar azalarkən, Meksika bazarında artım qeydə alınıb.

Dünyanın qalan hissəsində satışlar isə ötən ay illik müqayisədə 110% artaraq 240 min olub.

Benchmark Mineral Intelligence-in məlumat meneceri Çarlz Lester verilənlərlə bağlı dəyərləndirməsində, qlobal elektrikli avtomobil bazarında ötən ay satışların 1,6 milyon olduğunu bildirərək, ilin əvvəlindən bu yana satışların 5,6 milyona çatdığını qeyd edib. Bu rəqəmin 2025-ci ilin eyni dövrünə nisbətən kiçik bir azalmaya işarə etdiyini dilə gətirən Lester, Avropa və digər bölgələrdəki güclü artımın Çin və Şimali Amerikadakı satışlarda davam edən yavaşlamanın təsirini tarazlaşdırdığını ifadə edib.

Lester, Avropada ilin əvvəlindən bu yana satışların 26% artdığını və apreldə 400 min ədədə keçdiyini bildirərək, qitanın elektrikli avtomobil satışlarındakı artımın əsas hərəkətverici qüvvəsi olaraq qalmağa davam etdiyini qeyd edib. Çin bazarında satışların ilin əvvəlindən bu yana 17% düşdüyünü vurğulayan Lester, "Çin bazarı təzyiq altında qalmağa davam edir. İxrac sürətlə artarkən, xüsusilə kiçik avtomobil seqmentlərində daxili tələb, subsidiya dəyişikliklərindən təsirlənməyə davam edir. Şimali Amerika, ilin əvvəlindən bu yana 25% satış düşüşü ilə hələ də geridə qalır, lakin Meksika, Çindən edilən idxalın təsiri ilə daha güclü bir artım qeyd edib. Ümumilikdə, regional fərqliliklər, ixrac artımı və dəyişən rəqabət dinamiklərinin qlobal tendensiyaları formalaşdırdığı bir mühitdə, bazar daha mürəkkəb bir mərhələyə girir" qiymətləndirməsini edib.