OpenAI cümə günü ABŞ-da ChatGPT Pro abunəçiləri üçün şəxsi maliyyə alətlərini sınaq mərhələsində istifadəyə verib. Bu vasitə istifadəçilərə bank hesablarını bağlamaq və xərclərin təhlilindən gələcək maliyyə planlamasına qədər müxtəlif suallar vermək imkanı yaradır.

OpenAI bu imkanın yaradılmasında maliyyə bağlantıları xidməti göstərən "Plaid" şirkəti ilə əməkdaşlıq edir. İstifadəçilər Schwab, Fidelity, Chase, Robinhood, American Express və Capital One kimi 12 mindən çox maliyyə institutuna qoşula bilərlər. Hesablar bağlandıqdan sonra portfel performansı, xərclər, abunəliklər və yaxınlaşan ödənişləri görə bilərlər.

Yeni məhsul aprel ayında OpenAI-nin maliyyə startapı olan Hiro komandasını satın almasından cəmi bir ay sonra təqdim olunub. Hiro-nun maliyyə sahəsindəki ekspertizası məhsulun yaradılmasında faydalı olsa da, OpenAI məhsulun tam olaraq həmin komanda tərəfindən hazırlanıb-hazırlanmadığını bildirməyib.

İstifadəçilər ChatGPT-də yan menyudan “Maliyyə” seçimini klikləyərək və ya çat söhbətində “@Finances, connect my accounts” yazarq bu alətdən istifadə edə bilərlər. Chatbot sonra "Plaid" vasitəsilə hesabları əlaqələndirmək üçün istiqamət verəcək. OpenAI yaxın vaxtlarda Intuit dəstəyini əlavə etməyi planlaşdırır ki, bu da istifadəçilərə vergi təsiri və ya kredit kartının təsdiq olunma ehtimalı kimi analizlər aparmağa imkan yaradacaq.

OpenAI bildirir ki, hal-hazırda ayda 200 milyondan çox insan ChatGPT-dən maliyyə sualları verir. Yeni "GPT-5.5" modeli konteksti daha yaxşı təhlil edir və bu, maliyyə mövzularının cavablandırılmasında əhəmiyyətlidir. Şirkət maliyyə ekspertləri ilə birlikdə modelin bu sahədə inkişafı üçün benchmark yaradıb.

Bu maliyyə aləti vasitəsilə istifadəçilər “Son vaxtlar daha çox xərclədiyimlə bağlı dəyişiklik olubmu?” və ya “Növbəti 5 ildə öz bölgəmdə ev almaq üçün plan qurmağa kömək et” kimi suallara cavab ala bilərlər.

İstifadəçilər ayarlardan Hesablar > Proqramlar > Maliyyə bölməsinə daxil olaraq istədikləri hesabların bağlantısını kəsə bilərlər. Bağlantı kəsildikdə ChatGPT-də sinxronlaşdırılmış məlumat 30 gün ərzində silinəcək. Bundan başqa, istifadəçilər maliyyə yaddaşlarını da həmin bölmədən izləyib silə bilərlər.

Ümumi məqsədli chatbotlar hər mövzuya cavab vermək üçün hazırlanır. İstifadəçilər sağlamlıq, maliyyə və şəxsi həyat kimi həssas mövzularda suallar verirlər və süni intellekt şirkətləri bu sahələr üçün ixtisaslaşmış məhsullar təqdim etməyə başlayıblar. OpenAI və Anthropic səhiyyə üçün alətlər işə salıb, bu ayın əvvəlində isə Perplexity maliyyə araşdırmaları məhsulunu təqdim edib.

OpenAI şəxsi maliyyə alətlərinin ChatGPT-nin veb və iOS versiyalarında Pro istifadəçilər üçün mövcud olduğunu bildirib. Şirkət əlavə edib ki, istifadəçilərin rəyi əsasında məhsulu təkmilləşdirərək yaxın gələcəkdə Plus istifadəçilərə də açmaq istəyir.