Bəzi NATO üzv ölkələrinin parlamentar liderləri İstanbuldakı NATO Parlament Zirvəsində alyansın müdafiə qabiliyyətinin gücləndirilməsi, birliyin möhkəmləndirilməsi və əməkdaşlığın yaxınlaşdırılması çağırışı edib.

Türkiyənin ev sahibliyi etdiyi zirvədə Bolqarıstan Milli Məclisinin sədri Mihaela Dotsova deyib ki, iyulun 7-8-də Ankara şəhərində keçiriləcək NATO liderləri sammiti alyansın Avro-Atlantik regionda kollektiv təhlükəsizlik və sabitliyə bağlılığını yeniləmək üçün yaxşı imkandır.

Dotsova bildirib ki, NATO Bolqarıstanın təhlükəsizliyinin əsas daşı olaraq qalır, ölkə hərbi qüvvələrini müasir standartlara uyğunlaşdırır.

Xorvatiya Parlamentinin sədri Qordan Yandrokoviç Rusiyanın Ukraynaya qarşı hücumları, hibrid təhdidlər, pozucu texnologiyalar və artan strateji rəqabətin Avropanın təhlükəsizlik vəziyyətini dəyişdirdiyini vurğulayıb.

O qeyd edib ki, hərbi güc zəruri olsa da təkbaşına kifayət deyil, kritik infrastruktura, iqtisadi və texnoloji tərəqqiyə, həmçinin siyasi birlikə ehtiyac var.

Yandrokoviç bildirib ki, Xorvatiya 2030-cu ilə qədər ÜDM-in 3 faizini müdafiəyə ayırmağı planlaşdırır və bunu 2035-ci ilə qədər 5 faizə çatdırmaq niyyətindədir.

Niderland Nümayəndələr Palatasının sədri Tom van Kampen parlament diplomatiyasının ölkələr arasında etimadın qurulmasında və transatlantik həmrəyliyin möhkəmlənməsində vacib rol oynadığını deyib.

O vurğulayıb ki, Türkiyədə görüşmək təsadüfi deyil, bu ölkə qitələr və mədəniyyətlər arasında körpü rolunu oynayır. NATO-nun birlikdə, qərarlı və fəaliyyətə hazır olduğunu göstərmək lazımdır.

Bir sıra ölkə təmsilçiləri Ukraynaya dəstəyin davam etdirilməsinin əhəmiyyətini qeyd edib.

Estoniya Parlamentinin sədri Lauri Hussar NATO üzvlərinin 2035-ci ilə qədər ÜDM-in 5 faizini müdafiəyə ayırmaq qərarını tarixi addım sayıb. O, regional müdafiə planlaması və hava müdafiəsində əməkdaşlığın dərinləşdirilməsinin vacib olduğunu vurğulayıb.

Polşa Senatının sədri Maqorzata Kidava-Blonska Rusiyaya qarşı müqavimətin artırılmasını və Ukraynaya güclü dəstək olunmasını istəyib.

Böyük Britaniya Lordlar Palatasının sədri Maykl Forsayt Türkiyəni Avropa, Yaxın Şərq, Afrika və Asiyanın kəsişməsində dəyərli tərəfdaş kimi xarakterizə edərək, Ankaranın regionları birləşdirən və münaqişələrin həllində diplomatik rol oynadığını deyib.

Forsayt bildirib ki, qarşısının alınması münaqişədən az xərc tələb edir, kollektiv müdafiə isə təkbaşına hərəkətdən daha təsirlidir.

Fransa NATO Parlament Assambleyası nümayəndə heyətinin rəhbəri Nataliya Pouziref Ukraynanın gələcəyinin NATO-dan olduğunu və ölkənin Avro-Atlantik inteqrasiyasının regional təhlükəsizlik və sabitliyə birbaşa töhfə verəcəyini deyib.

Çexiya Senatının sədri Miloş Vystrçil Avropanın NATO-nun müdafiəsində daha çox məsuliyyət götürməli olduğunu vurğulayıb. O, güclü Avropanın güclü NATO demək olduğunu bildirib.

Yunanıstan NATO Parlament Assambleyası nümayəndə heyətinin müavini Dimitris Keridis İstanbulu möhtəşəm adlandıraraq Türkiyənin Şengen Bölgəsinə daxil edilməsinin vacib olduğunu və Yunanıstanın dostluq əlini uzatmağa hazır olduğunu söyləyib.

Ankarada keçiriləcək NATO liderləri sammiti iyulun 7-8-də baş tutacaq.