Livan və İsrail arasında atəşkəs və Hizbullahın silahsızlandırılması üzərində baş tutacaq yeni danışıqlar cümə axşamı və cümə günü keçiriləcək.

Bu, İsrail tərəfindən dəfələrlə pozulan zəif atəşkəsin qorunması üçün nəzərdə tutulub. Atəşkəs şənbə günü sona çatır.

Bu il üçüncü dəfədir ki, Livan və İsrail nümayəndələri üz-üzə görüşür. Ötən dəfə aprelin 14-də Vaşinqtonda səfirlər səviyyəsində, aprelin 23-də isə ikinci raund danışıqlar keçirilib.

Danışıqlar prosesi Livanı iki hissəyə bölüb – ölkə İsraili tanımır və prezident Cozef Aunla baş nazir Nəvaf Salam birbaşa danışıqları dəstəkləsə də, Hizbullah və parlament sədri Nəbih Berri kimi müttəfiqləri dolayı yolla danışmağın tərəfdarıdır.

Danışıqlara hazırlanarkən, İsrail atəşkəsi pozmağa davam edir. Çərşənbə günü İsrail dronları Livanın cənubunu paytaxt Beyrutla birləşdirən əsas yolda hərəkət edən avtomobilləri hədəf alaraq, iki uşağın da daxil olduğu səkkiz nəfəri öldürüb. Ölkənin digər hissələrində isə doqquz nəfər həlak olub.

Cümə axşamı İsrail Livana qarşı hücumlarını davam etdirib və Beka Vadisinin şərqində və cənubunda bəzi qəsəbələrdən zorla köçürülmələr barədə xəbərdarlıq yayıb.

Danışıqda iştirak edəcək nümayəndələr əvvəlki raundlarda iştirak edən rəsmilərdən ibarət olacaq, o cümlədən ABŞ-ın İsraildəki səfiri Mayk Hakabi. Hər iki tərəfdən diplomatik və hərbi nümayəndə heyətinin iştirak edəcəyi gözlənir.

Livan nümayəndəliyinə prezident Aun tərəfindən təyin edilən diplomat Simon Karam rəhbərlik edəcək. Keçmiş görüşlərdə iştirak etmiş ABŞ-a Livanın səfiri Nədə Həmadi Moavad və qərargah müavini Vissam Butrus da iştirak edəcəklər. Danışıqlara yeni əlavə olaraq Livanın Vaşinqtondakı hərbi attaşesi general Oliver Həkmə qatılacaq.

İsrailin Vaşinqtondakı səfiri Yeçil Leyter İsrail ordusunun Strateji Bölməsinin rəhbəri briqada general Amixay Levin və İsrail Milli Təhlükəsizlik Şurasının müavin müşaviri Yossi Drazninlə birgə iştirak edəcək.

Livan daxilində birbaşa danışıqlar mövzusu ölkədə dərin fikir ayrılığına səbəb olub. Prezident, baş nazir və parlament sədri – Livanın konfesional sisteminə görə müxtəlif dini icmalardan seçilmiş şəxslər – danışıqların strukturu və ya məqsədi ilə bağlı razılığa gələ bilməyiblər.

ABŞ hətta prezident Aun ilə İsrailin baş naziri Benyamin Netanyahunun birbaşa görüşünü təklif edib ki, bu da Livanda gərginliyin artması ehtimalını gücləndirib.

Təhlilçilərin fikrincə, Livandakı daxili qarşıdurma İsrail üçün əlverişli ola bilər. Beyrutda fəaliyyət göstərən Badilin siyasət direktoru Sami Halabi deyib ki, nizam-intizamın pozulması və vətəndaş qarşıdurması İsrailə ən çox fayda verəcək ssenaridir.