“Israel Hayom” qəzetində yer alan xəbərə görə, Baş nazir Benyamin Netanyahunun (Benjamin Netanyahu) koalisiya tərəfdaşı, ifrat sağçı “Yəhudi Gücü Partiyası”ndan (Jewish Power Party) qadın millət vəkili Limor Son Har-Meleç (Limor Son Har-Melech) tərəfindən “Oslo Sazişi”nin ləğvi üçün təqdim edilən qanun layihəsinin müzakirəsi təxirə salınıb.

Xəbərdə qeyd olunur ki, təqdim olunan qanun layihəsinin İsrail Parlamentinin qanunvericilik komitəsində müzakirəsi Netanyahunun tələbi ilə təxirə salınıb.

İsrailin Ədliyyə naziri Yariv Levinin (Yariv Levin) təxirəsalma fikrini dəstəklədiyi bildirilir. Levin təxirəsalmanın qanun layihəsinə etiraz mənasına gəlmədiyini ifadə edərək deyib: “Nəticədə mənim məlumatsız olduğum məsələlərdən xəbərdar olan bir baş nazir var. Müzakirə baş nazirin təsdiqinə qədər təxirə salınıb”.

İsrail Hökumətinin katibi Yossi Fuks (Yossi Fuchs) isə qanun layihəsi ilə bağlı “Amerikalılarla əməkdaşlığın zəruri olduğunu anlamalıyıq” xəbərdarlığını edib.

İsrailin ifrat sağçı Milli Təhlükəsizlik naziri İtamar Ben-Qvir (Itamar Ben-Gvir) də mövzu ilə bağlı deyib: “Hər kəs Oslo Sazişinin absurd olduğunu dərk edir. Fələstin rəhbərliyi terroru dəstəkləyir və buna çağırır. Bəzi dəyişikliklər etmişik, lakin daha çoxu edilə bilər. Bunu daha da irəli aparmaq ən yaxşısıdır və bunun bir fürsət olduğuna inanıram”. Bu ifadələrlə Ben-Qvir qanun layihəsini dəstəkləyib.

Millət vəkili Har-Meleç “X” (keçmiş “Twitter”) sosial media platforması vasitəsilə mayın 9-da verdiyi açıqlamada deyib: “Biz Fələstin dövlətinin qurulmasına mane olmaq və A və B zonalarında yaşayışı təşviq etmək, fəlakətli “Oslo Sazişi”ni ləğv etmək üçün söz verdik və indi bunun vaxtıdır”.

Har-Meleç sözügedən hüquqi tənzimləməni mövcud vəziyyətin düzəldilməsi üçün “ilk və zəruri addım” kimi xarakterizə etmişdi.

**“Oslo Sazişi”**

“Oslo-1” olaraq da bilinən “müvəqqəti özünüidarə tənzimləmə prinsipləri bəyannaməsi” sazişi Norveçin paytaxtı Osloda keçirilən danışıqlardan sonra 13 sentyabr 1993-cü ildə o dövrkü İsrail Baş naziri İshak Rabin (Yitzhak Rabin) və Fələstin Azadlıq Təşkilatı (FAT) lideri Yasir Ərəfat (Yasser Arafat) arasında ABŞ-ın paytaxtı Vaşinqtonda imzalanıb.

Sazişlə tərəflər arasında illərdir davam edən münaqişəyə son qoyulması, əvvəlcə müvəqqəti Fələstin Muxtariyyətinin qurulması və 1999-cu ildə müstəqil Fələstin Dövlətinin qurulması ilə ədalətli, qalıcı və hərtərəfli sülhə nail olunması hədəflənirdi.

Birincisindən sonra 28 sentyabr 1995-ci ildə imzalanan “İkinci Oslo Sazişi” çərçivəsində işğal altındakı İordan çayının qərb sahili A, B və C zonalarına ayrılmışdı. İordan çayının qərb sahilinin yüzdə 18-ni əhatə edən “A zonası”nın idarəetməsi və təhlükəsizliyi Fələstinə, yüzdə 21-lik “B zonası”nın idarəetməsi Fələstinə, təhlükəsizliyi isə İsrailə ötürülürkən, yüzdə 61-ni əhatə edən “C zonası”nın idarəetməsi və təhlükəsizliyi İsrailə buraxılmışdı.