Livanın Milli Xəbər Agentliyinin (NNA) məlumatına görə, atəşkəs və ABŞ ilə İran arasında müharibənin bütün cəbhələrdə dayandırılması ilə bağlı razılığa baxmayaraq, İsrailin cənubdakı Nabatiyəh vilayətində hava zərbələri nəticəsində ən azı dörd nəfər həlak olub.

Çərşənbə axşamı Mayfadun şəhərində iki avtomobil ayrı-ayrılıqda dron hücumlarına məruz qalıb. NNA-nın məlumatına görə, üçüncü avtomobil Şoukin kəndində hədəfə alınıb.

İran və ABŞ arasında aparılan həssas danışıqlar zamanı rəsmi Tehran hər dəfə vurğulayıb ki, atəşkəs razılaşması İsrailin Livana qarşı hücumlarının dayandırılmasını da nəzərdə tutmalıdır.

Razılaşmanın yekun mətninin hələ açıqlanmadığı bir vaxtda, münaqişədə vasitəçi rolunu oynayan Pakistanın baş naziri bazar ertəsi bildirib ki, sənəd "Livan da daxil olmaqla bütün cəbhələrdə" hərbi əməliyyatların dərhal dayandırılmasını nəzərdə tutur.

İranın Xarici İşlər naziri Abbas Araqçi çərşənbə axşamı bildirib ki, İsrailin Cənubi Livanı işğal etməyə davam etməsi razılaşmanın pozulmasıdır. O əlavə edib: “İsrail qüvvələri müharibə dövründə işğal etdikləri ərazilərdən geri çəkilmədən müharibə tam başa çatmayıb.”

İranın baş danışıçısı Məhəmməd Baqer Qalibaf Livanın Parlamenti sədri Nabih Berri ilə telefon danışığında ABŞ-ın İsraili Livana qarşı müharibəyə son qoymağa, evlərin dağıdılmasını dayandırmağa və işğal olunmuş torpaqlardan çəkilməyə məcbur etməsini tələb edib.

ABŞ ilə İran arasında razılıq açıqlanandan sonra İsrailin Baş naziri Benyamin Netanyahunun sözlərinə görə, İsrail Cənubi Livanda işğalını davam etdirəcək.

Bu arada, Livanın "Hizbullah" qruplaşması Reuters xəbər agentliyinə bildirib ki, İran ABŞ ilə növbəti danışıqlar mərhələsində İsrail qoşunlarının Livandan çıxarılmasını tələb etməyə zəmanət verib.

Martın 2-də döyüşlərin bərpasından sonra İsrailin hücumları nəticəsində Livanda ən azı 3.826 nəfər həlak olub, 11.851 nəfər yaralanıb, ölkənin səhiyyə nazirliyi açıqlayıb.