İsrail həbsxanalarında 2023-cü ilin oktyabr ayından bəri fələstinli məhbuslara tətbiq edilən təcrid cəzalarında görünməmiş artım müşahidə olunduğu bildirilib.

İnsan Haqları üçün Həkimlər Təşkilatının ("PHRI") məlumatına görə, İsrailin 2023-cü ilin oktyabr ayından bəri Qəzza zolağına etdiyi hücumlarla eyni vaxtda fələstinli məhbuslara qarşı təcrid metodlarının sistematik şəkildə sürətləndiyi qeyd edilib.

Həmçinin, cəza təcridinin məhbusları cəzalandırmaq və həbsxana intizamını təmin etmək məqsədi ilə mərkəzi bir alət kimi geniş şəkildə istifadə edilməsinə doğru böyük bir dönüşüm yaşandığı vurğulanıb.

İsrail həbsxanalarında "intizam" bəhanəsi ilə təcrid altında saxlanılan fələstinlilərin sayı 2023-cü ildən əvvəl 2 mindən az olduğu halda, bu rəqəmin 2024-cü ildə 300 faiz artaraq aralarında uşaq və qadınların da olduğu 4717-yə yüksəldiyi bildirilib.

Keçən illərə nisbətən "şok" bir artımın müşahidə edildiyi hesabatda, 2022-ci ildə təcrid edilən uşaqların sayının 1 olduğu, lakin bu rəqəmin 2024-cü ildə 19 min 800 faiz artaraq 199-a çatdığı qeyd olunub.

Təcrid cəzası verilən fələstinli qadın məhbusların sayının isə 2022-ci ildə 2 olduğu, 2024-cü ildə isə 1150 faiz artaraq 25-ə yüksəldiyi qeyd edilib.

2023-cü ilin oktyabr ayından bəri geniş yayılmış bu tətbiqin sistematik aclıq, işgəncə və tibbi laqeydlik iddiaları ilə birləşərək fələstinli məhbuslar üçün ağır insan haqları pozuntusu olmaqdan əlavə, bir "sakit məhv" metoduna çevrildiyi ifadə edilib.