Fransanın cənub-qərbinə aid bir kənddə bazar ertəsi günü tornado olub. Hadisədə 41 nəfər yaralanıb, yüzlərlə ev dağılıb, rəsmi şəxslər məlumat verib.

Fransa hakimiyyətləri ölkənin cənub-qərb hissəsini fırtına təhlükəsi ilə bağlı narıncı xəbərdarlıq elan edib. Bir çox ərazilərdə elektrik enerjisi kəsilib, nəqliyyat sistemində problemlər yaranıb.

Aude departamentində yarış təşkilatçıları burada keçirilən Vuelta a Espana velosiped yarışının üçüncü mərhələsini ləğv edib. Dolu yağışı velosipedçiləri sığınmağa məcbur etdi.

Tornado daha çox Pomas kəndində ziyan vurub. Təxminən 1 000 sakin yaşayan kənddə 300-ə yaxın ev zərər çəkib, bəzi evlərin damları uçub.

Yaralananlardan 15 nəfər xəstəxanaya yerləşdirilib.

Milli hava xidmətləri Meteo-France yaxınlıqdakı Arquettes-en-Val kəndində küləyin saatda 117 kilometr sürətə çatdığını açıqlayıb.

Cənubi Fransada baş verən fırtına nəqliyyat sistemini pozub. Qatarların gecikməsi, yollarda bağlanmalar, Bordeaux, Marsel, Niss, Tulüz və hətta Parisdə hava limanlarında gecikmə və uçuşların ləğvi qeydə alınıb. Bu barədə Nəqliyyat naziri Filip Tabarot məlumat verib.

Rəsmi şəxslər bildirir ki, 10 kənddə təxminən 2 800 ev elektrik enerjisindən məhrum qalıb.

Fransada ildə orta hesabla bir neçə on tornado baş verir.

Meteo-France bildirir ki, qlobal istiləşmənin bu tornado hadisələrinin sayına və gücünə təsiri hələlik məlum deyil.