"Choice" təşkilatının araşdırmasına görə, Avstraliyada onlayn bazarlarda oyuncağa bənzər siqaret çaxmaqları, jel tapançalar, açılan bıçaqlar və saxta dil sırğaları kimi təhlükəli və qadağan olunmuş məhsullar satılır.

Bu məhsulların satışı müəyyənləşdirildikdən sonra, "Choice" çərşənbə günü Avstraliya Rəqabət və İstehlak Komissiyasından (ACCC) satıcılara qarşı tədbir görməsini və ölkənin məhsul təhlükəsizliyi qanunlarının ümumi şəkildə nəzərdən keçirilməsini tələb etdi.

Təşkilat məsələni o qədər ciddi hesab edir ki, bu barədə ACCC-yə illik verilən xüsusi "super" şikayət müraciəti edib və bu da tənzimləyicini 90 gün ərzində cavab verməyə məcbur edir.

"Choice" qanunların sərtləşdirilməsini tələb edir ki, onlayn bazarlarda "gizli" yolla təhlükəli məhsullar satışdan kənarlaşdırılsın.

ACCC əvvəlcə uşaq məktəb çantalarında düymə batareyası ilə bağlı xəbərdarlıq tələblərinə əməl etməməkdə ittiham olunan "Amazon"a qarşı məhkəmə iddiası qaldırıb. Sonra o, yüksək güclü maqnitlər kimi qadağan olunmuş məhsulların onlayn bazarlardan çıxarılması üçün addımlar atıb.

"Choice" müxtəlif brendlərin onlayn satış saytlarından oyuncağa bənzər çaxmaq və saxta siqaretlər alaraq onları sınaqdan keçirib. Bu məhsullar uşaq təhlükəsizliyi və yanğın riskinə görə Avstraliyada qadağandır.

Həmçinin "Choice" saxta dil sırğalarının boğulma riski yaratdığını müəyyən edib. Bu məhsullar da AliExpress və eBay kimi platformalardan çıxarılıb.

Digər testlərdə cib bıçaqları və jel tapançaların "əsasən silah kimi" satılması aşkar edilib, lakin hüquqi problemdən yayınmaq üçün onlar alınmayıb.

"Choice" tərəfidən aparılan milli sorğuya əsasən, son iki ildə onlayn alış-veriş edən avstraliyalıların 6 faizi zədə, əmlak ziyanı və ya hər ikisi ilə üzləşib.

Təşkilat nümayəndələri uzun illərdir ki, məhsul təhlükəsizliyi qanunlarındakı boşluqlara diqqət çəkir və istehlakçıların risk altında olduğunu vurğulayır.

ACCC "Choice"-nin şikayətini diqqətlə araşdıracağını və yaxın vaxtlarda ictimai cavab verəcəyini bildirib. Rəqabət və istehlak mövzusunda məsuliyyət daşıyan köməkçi nazir Endryu Li isə fövqəladə büdcədə ölkənin məhsul təhlükəsizliyi sisteminin gücləndirilməsini nəzərdə tutduğunu bildirib.

Büdcə çərçivəsində məhsulların geri çağırılması, onlayn bazarlarda təhlükəsizlik tələblərinin tətbiqi və istehlakçıları riskə atan şirkətlərə ağır cəzaların tətbiqi nəzərdə tutulur.

"Amazon" və "Shein" şirkətləri müştəri təhlükəsizliyini prioritet saydıqlarını bildiriblər. Amazon məhsulları diqqətlə izlədiyini və təhlükəli məhsulları dərhal silindiyini söyləyib. Shein isə standartlara əməl etməyən satıcılara qarşı sanksiyalar tətbiq etdiyini qeyd edib.

AliExpress-in ana şirkəti "AliBaba" və eBay isə mövzuya dair açıqlama verməyib.