Go-nun bu ilin Yaponiya üçün ən böyük IPO-su ölkənin zəifləmiş səhm bazarına stimul verməklə yanaşı, taksi çağırma tətbiqində sürücü çatışmazlığı kimi əsas problemi həll etmək üçün kapital yaradıb.

Çərşənbə axşamı ictimaiyyətə açılan Go IPO zamanı topladığı 88,6 milyard yen (553 milyon dollar) vəsaiti robotaksi biznesini genişləndirmək və satınalmalar aparmaq üçün sərf etməyi planlaşdırır, şirkət nümayəndəsi bildirib.

“Yeni buraxılan səhm satışından əldə olunan vəsaiti robotaksi ilə bağlı tədqiqatlara, həmçinin taksi sənayesində və digər sahələrdə strateji birləşmələrə və satınalmalara sərmayə qoyuluşuna yönəltməyi gözləyirik,” - deyə o vurğulayıb.

Yaponiyanın taksi çağırma şirkətinin IPO-su ölkədə səhm dövriyyəsinin ən sakit dövrlərindən birində baş verib. Hökumət startup-lara IPO-ya getməkdənsə özlərini satmağı tövsiyə edir. Go bu prosesdə "BlackRock", "Wellington Management" və "M&G Investment Management"dən investisiyalar cəlb edib. Səhmlərin qiyməti IPO qiyməti olan 2.400 yenə nisbətən cümə günü 2.314 yenə düşüb, yəni təxminən 4 faiz azalıb.

Go-nun robotaksi planları Yaponiyanın sürücü çatışmazlığı probleminə əsaslanır. Ölkənin taksi sənayesində sürücülərin sayı azalmaqdadır.

Yaponiya Torpaq, İnfrastruktur, Nəqliyyat və Turizm Nazirliyinin hesabatına əsasən, son illərdə taksi sürücülərinin sayı təxminən 20 faiz azalıb.

Yaşlanan əhali isə bu azalmənin bərpasına mane olur. 2024-cü ildə ölkədə paylaşılan sürücülük xidmətləri istifadəyə verilib, lakin onlar yalnız müəyyən ərazilərdə fəaliyyət göstərir və sürücülərin taksi şirkətində işləməsini tələb edir. Bu məhdudiyyətlər isə sürücü çatışmazlığını azaltmağa xeyli kömək etməyib.

Go 1977-ci ildə taksi operatoru kimi yaranıb. Hazırda Yaponiya üzrə 35 milyon yüklənmə sayı, 85 min tərəfdaş nəqliyyat vasitəsi və istifadə vaxtına görə ölkənin taksi tətbiqi bazarının 80 faizini əhatə edən tətbiq ilə 47 prefekturanın 46-sında fəaliyyət göstərir.

Şirkət robotaksilərin gələcəyinin ayrılmaz hissəsi olacağını düşünür, amma bu ideyanın nə vaxt gerçək olacağı bilinmir.

Go "Alfabet"in avtonom sürücülük istiqamətində fəaliyyət göstərən törəmə şirkəti Waymo ilə əməkdaşlıq edir. Tərəfdaşlıqda həmçinin Yaponiyanın ən böyük taksi operatorlarından "Nihon Kotsu" da iştirak edir. Şirkət nümayəndəsinə görə, Go tərəfdaşlığın strateji koordinasiyasına cavabdehdir. CEO Hiroşi Nakadjima isə əvvəlcədən bildirib ki, Go özü avtonom sürücülük sistemlərinə sərmayə qoymayacaq.

Go tam sürücüsüz avtomobil idarəçiliyi üçün vaxt çərçivəsi açıqlamayıb.

“Texnologiyamızı təsdiqlədikdən və icazə aldıqdan sonra tam insan iştirakı olmadan avtonom sürücülüyü başlamayı planlaşdırırıq,” deyə nümayəndə qeyd edib.

Hazırda Go ənənəvi biznesinə rəqabət qabiliyyəti qazandırmaq üçün yeni yollar axtarır. Məsələn, şirkət "Kakao T", "Alipay" və "WeChat Pay" kimi platformalarla əməkdaşlıq edərək Cənubi Koreya, Çin və Tayvandan gələn səyahətçilərə öz yerli tətbiqlərindən birbaşa Go ilə əməkdaşlıq edən taksiləri çağırmaq imkanı verir.

Go təkcə Tokionun robotaksi gələcəyinə inanıb fəaliyyət göstərən şirkət deyil.

Mart ayında "Uber", "Wayve" və "Nissan" Tokioda 2026-cı ilin sonuna qədər robotaksi xidmətlərinin pilot layihəsini elan edib. Bu, "Uber"in Yaponiyada ilk avtonom avtomobil tərəfdaşlığıdır. Xidmət "Wayve"nin süni intellektlə idarə olunan "Nissan Leaf" elektrik avtomobillərindən istifadə edəcək və "Uber" tətbiqi vasitəsilə sifariş ediləcək.

"Uber" həmçinin "S.Ride" ilə əməkdaşlıq edərək beynəlxalq ziyarətçilərin "Uber" tətbiqi vasitəsilə sürücü sifariş edə bilməsini təmin edib. "Didi Mobility Japan", „SoftBank“ və "Didi Chuxing" arasında birgə müəssisə kimi oxşar razılaşmaya malikdir.