Londonun şimalında iki sərnişin qatarının toqquşması nəticəsində bir nəfər həlak olub, onlarca insan yaralanıb. Yaralılardan 11-nin vəziyyəti ağırdır, Birləşmiş Krallığın təcili yardım xidməti cümə günü məlumat verib.

Qəza Britaniya paytaxtından təxminən 90 kilometr şimalda, Bedford yaxınlığında baş verib. Toqquşma eyni relsdə hərəkət edən, London istiqamətində olan iki qatar arasında olub, East Midlands Railway (EMR) açıqlayıb.

“Mən önümdəki oturacağa atıldım və dərhal sonra tüstü gördüm. İnsanlar ağlayır, qışqırır, çox qorxmuş və çaşqın idilər,” sərnişin Pit Knap Press Association agentliyinə deyib.

O əlavə edib: “Danışa bilməyən, qırıq ayaqlı çox insan gördüm.”

Qəza baş verdikdən təxminən beş saat sonra East of England Ambulance Service hadisə yerində bir nəfərin ölməsini təsdiqləyib.

“Əlavə olaraq 11 nəfər ağır xəsarət alıb, 22 nəfər ciddi xəsarətlidir, daha 56 nəfər isə yüngül xəsarətə malikdir,” məlumatda qeyd olunub.

Yüngül xəsarət alanlar hadisə yerində müalicə olunub və ya xəstəxanaya aparılıb.

Böyük Britaniya Baş naziri Kir Starmer hadisənin “çox narahatedici” olduğunu və fikirlərinin “həyatını itirən şəxsin ailəsi və ağır yaralananlarla” olduğunu söyləyib. O, təcili yardım xidmətlərinə tez reaksiya gəldiyinə görə təşəkkür edib.

Hava təcili yardım vasitələri

Sosial mediaya yerləşdirilən təsdiqlənməmiş görüntülərdə sərnişinlər zədələnmiş iki EMR qatarının yanında relslər boyunca hərəkət edir, bəziləri isə yaxınlıqda bir sahədə gözləyirdi.

Hava görüntülərinə əsasən, qatarlar əsasən relsdən çıxmayıb və düz vəziyyətdədir, yalnız bir vagon relsdən kənara çıxıb.

Knap Bluesky platformasında şəkillər və video paylaşaraq qatarın “ön vagonunda” olduğunu və yaşadığı şoku ifadə edib.

“Ayaqlarım qanlı, arxama zərbəm var, amma özümdəyam. Digərləri yaxşı deyil,” o deyib.

Teresa İtabor BBC-yə bildirib ki, “güclü səs eşidib və başı önündəki oturacağa dəyib.”

“Gözlərimi açanda qan içində yıxılan insanları gördüm,” deyə əlavə edib.

EMR-nin nümayəndəsi toqquşmanın London St Pancras stansiyasına gedən iki cənub istiqamətli qatarı əhatə etdiyini təsdiqləyib.

Qatlardan biri Corbi, digəri Nottingemdən yola çıxıb, hər ikisi İngiltərənin mərkəzindən gəlirdi.

Bəyanatda bildirilib ki, EMR qatarları həmin axşam London St Pancras stansiyasına girmək və çıxmaq imkanından məhrum olub.

Hadisə yerində araşdırma aparılır

Böyük Britaniya Nəqliyyat Polisi “böyük hadisə” elan edib və sahədə çoxagentlikli yardım işi davam edir.

Yardım xidməti 20-dən çox təcili yardım maşını və altı hava təcili yardım vasitəsi göndərdiyini deyib.

“Ən ağır yaralılar artıq hadisə yerindən xəstəxanaya aparılıb,” məlumatda bildirilir.

Böyük Britaniya tramvay və dəmir yolu qəzalarını araşdıran Dəmir Yolu Qəzaları Araşdırma Şöbəsi müfəttişlərinin hadisə yerində olduğunu və sübut toplamağa başladığını açıqlayıb.

Dəmir yolu üzrə ekspert Toni Mails Sky News-ə söyləyib ki, toqquşma “nisbətən aşağı sürətlə olub” və qatar zədələri “nisbətən minimaldır.”

Lakin o xəbərdarlıq edib ki, “aşağı sürətli toqquşmalar belə qatarda olanlar üçün təhlükəli ola bilər.”

Böyük Britaniyada qatar qəzaları, xüsusən ölümcül halları nadir olur.

2023-cü ilin sentyabrında Şotlandiyada Avimor stansiyasında iki qatarın toqquşması nəticəsində bir neçə nəfər yaralanmışdı.

Qəza Stratspey Dəmir Yolunda baş verib; burada dayanan vaqon ilə digər qatar toqquşmuşdu. Bu dəmir yolu kütləvi nəqliyat xidmətlərindən ayrı tarixi xəttdir.

2020-ci ilin avqustunda Şimal-Şərqi Şotlandiyanın Stounheven yaxınlığında Abirdin-Glazqo xətti relsdən çıxmış, bu qəzada üç nəfər ölüb, altı nəfər xəsarət almışdı. Hadisənin səbəbi güclü yağışdan sonra torpaq sürüşməsi olub.