Türkiyə Səhiyyə Nazirliyi piylənmə və fiziki fəaliyyətsizliyin artması ilə mübarizə məqsədilə “Hərəkət Yaşını Bil, Sağlam Yaşa” adlı ölkəmiqyaslı kampaniyaya başlayıb.

Kampaniya daxilində şəhər və rayonlarda pulsuz fiziki sağlamlıq yoxlamaları keçirilir. Bu yoxlamaları əsasən fizioterapevtlər aparır və insanların bədən gücü, balansı və funksional qabiliyyəti üzrə hərəkət yaşını müəyyən edir.

Testlərə ümumi əzələ gücünü ölçən qol tutma dinamometri testi, aşağı bədənin dözümlülüyünü ölçən 30 saniyəlik otur-dur testi, eləcə də balans və koordinasiyanı yoxlayan testlər daxildir.

Nəticələr şəxsin fiziki vəziyyətini yaş qrupundakı normativlərlə müqayisə etməyə imkan verir.

11 iyun tarixində Ankarada proqramı təqdim edən Səhiyyə Naziri Kemal Memişoğlu artıq çəkiliyin, fiziki fəaliyyətsizliyin və asılılığın ölkədə əsas ictimai sağlamlıq problemlərindən olduğunu vurğulayıb.

Kampaniya çərçivəsində əyalət səhiyyə idarələri ictimai yerlərdə müvəqqəti “Sağlamlıq Küçələri” və hərəkətli test stansiyaları yaradıb. Vətəndaşlar bu stansiyalarda pulsuz yoxlamadan keçirlər.

Tədbirin açılışında Memişoğlu yoxlamalarda iştirak edib, daha sonra velosiped sürüb və basketbol oynayaraq aktiv həyat tərzinin vacibliyini göstərib.

Testlərin sonunda iştirakçılara hərəkət yaşı bildirir və lazım olan halda fərdi məşq və fiziki fəaliyyət göstərişləri üçün Sağlam Həyat Mərkəzlərinə istiqamətləndirirlər.

Türkiyə Statistika İnstitutunun 2 iyun tarixli məlumatlarına görə ölkədə fiziki fəaliyyətsizlik səviyyəsi 86,6 faizdir, piylənmə isə artmaqdadır. 15 yaşdan yuxarı piylənmiş şəxslərin payı 2022-ci ildə 20,2 faizdən 2025-ci ildə 21,8 faizə çatıb.

Ötən il keçirilmiş oxşar genişmiqyaslı kampaniyada 81 əyalətdə 10 milyondan çox insanın boyu və çəkisi ölçülüb.