Fransızca adının qısaltması MSF olan Həkimlər Sərhədsiz yardım təşkilatının daxili hesabatı Çadda yerli və xarici işçilərin qaçqınları istismar etdiyini üzə çıxarıb. Araşdırma göstərir ki, bəzən azyaşlı qızlar hədəf alınıb, bəzən isə qida yardımı və işlər cinsi əlaqə müqabilində paylanıb.

Hesabat ötən ilin iyulunda tamamlanıb, lakin bu məlumatı ilk dəfə şənbə günü The Associated Press yayıb.

Təşkilat 59 pozuntu iddiasını qəbul edib, lakin sağ qalanların danışmaqdan çəkinməsini nəzərə alaraq daha çox faktın ola biləcəyini vurğulayıb. Bu səbəbdən 18 yerli və xarici işçinin işinə son verilib və onların gələcəkdə işə qəbul edilməsinə qadağa qoyulub.

Daxili yoxlama 2024-cü ilin noyabrında AP-nin yayımladığı araşdırmanı izləyib. O araşdırma göstərmişdi ki, Çadda sığınacaq axtaran sudanlı qadınlara yardım işçiləri və yerli təhlükəsizlik qüvvələri cinsi əlaqə müqabilində iş və kömək təklif edib.

Dağıdıcı vətəndaş müharibəsinin dördüncü ilində on minlərlə sudanlı şərqi Çada məcburi köçkün düşüb. Minlərlə insan münaqişədə həyatını itirib.

Çadın qaçqın düşərgələrində MSF böhranla mübarizədə ən böyük təşkilatlardan biridir. Təşkilat daxili hesabatda istismarın qarşısını almaq və mübarizə üçün əlavə resurslar ayırdığını, personalı təlimləndirdiyini göstərsə də, tədbirlərin uzunmüddətli təsiri olmadığını deyib.

“Səmimi analiz”

MSF AP-yə bildirib ki, aşkar etdikləri hallar sistemlərinin zəif tərəflərini göstərən səmimi daxili analizdir.

59 pozuntu iddiası cinsi təcavüzdən istismara və zorakılığa qədər müxtəlif halları əhatə edir və təşkilata görə, bu hallar "MSF-nin dəyərlərinə və öhdəliklərinə ağır zərbə vurur". Onlar vurğulayıb ki, "buna görə dərin təəssüf hissi keçirirlər".

MSF araşdırmaya 2024-cü ildə başlayıb və sudanlı qaçqınlarla bir sıra çadlı MSF işçilərinin istismar və zorakılığa məruz qaldığını təsdiqləyib.

Təşkilat qeyd edib ki, azyaşlı qızlar da daxil olmaqla qadın qaçqınların prostitusiyaya məruz qaldığı hallar aşkarlanıb.

Bir hadisədə yeddi qaçqın qızın gündəlik işçi kimi işə götürüldüyü bildirilir. Onlar MSF-nin avtomobilinə mindirilib və su paylanması ilə tikinti sahələrinə aparılacaqları deyilsə də, başqa yerə aparılaraq cinsi təcavüz və cinsi əlaqə tələb olunması ilə üzləşiblər.

Yoxlamalar zamanı sağ qalanların bəziləri qorxaraq susub, danışanların bəzilərinə isə sonradan yardım göstərilməyib.

Dünyanın müxtəlif ölkələrində on minlərlə işçi işlədən MSF hesabatda qaçqın böhranının genişliyi və insanların hərəkəti səbəbindən hər kəsə nəzarət edə bilmədiyini vurğulayıb.

Təşkilat istismarın qarşısını almaq və aşkar etmək üçün gizli şikayət mexanizmləri də daxil olmaqla üsulları təkmilləşdirməkdədir.

MSF bildirib ki, oxşar iddialar əvvəllər də, o cümlədən 2021-ci ildə Konqo Demokratik Respublikasında Ebola epidemiyası zamanı da səsləndirilmişdi.