Türkiyə Yaxın Şərqdə qarşıdurmalar bitdikdən sonra bölgədə daha parlaq bir rol oynayacaq. Bu ölkənin iqtisadiyyatı, infrastrukturu, təcrübəli institutları, peşəkar kadrları və ən əsası möhkəmlənmiş daxili birliyi ilə sabitlik adası kimi təsvir edilir, Prezident Rəcəb Tayyib Ərdoğan mayın 26-da Qurban Bayramı münasibətilə yayımladığı mesajda qeyd edib.

Ərdoğan vurğulayıb ki, dünya, xüsusilə də Yaxın Şərq ağır vəziyyətdən keçir. O, Qəzzada, Qərb sahilində, Qüdsdə və Livanda İsrailin təcavüzünü, habelə ABŞ-İran münaqişəsinin enerji, kənd təsərrüfatı, nəqliyyat və geniş iqtisadiyyata təsirlərini xüsusilə qeyd edib.

"Keçən 23 ildə həm tənqidlərə, həm də əngəllərə baxmayaraq müdafiə sənayesi sahəsində həyata keçirdiyimiz siyasətlərin bəhrəsini görürük," deyən Ərdoğan Türkiyə iqtisadiyyatının iki onillikdə 238 milyard dollardan 1,6 trilyon dollara yüksəldiyini xatırladıb.

O, müdafiə sənayesi ixracatının 10 milyard dollara çatmasının dünya səviyyəsində nadir uğur olduğunu qeyd edib.

"Ətrafımızda toz-duman çökəndən sonra Türkiyə yeni eranın parlayan ulduzlarından biri olacaq. Bu məqsədlə hər şeyi yerinə yetiririk," deyən Prezident davam edən terrorizmdən azad Türkiyə layihəsinin də bu niyyətə xidmət etdiyini vurğulayıb.

Ərdoğan sözügedən layihənin ölkənin gələcəyi və regionun sabitliyi üçün strateji əhəmiyyətinin indilərdə daha yaxşı başa düşüldüyünü bildirib.

"Biz sərhədlərimizdə sülh və təhlükəsizliyin güclənməsinə, sərhədlərimizin hüdudlarından kənarda imperialist oyunların pozulmasına xidmət edən bu tarixi prosesi diqqət və səmimiyyətlə davam etdiririk," deyən Ərdoğan əlavə edib:

"Bu problem səbəbindən Türkiyənin iqtisadi itkiləri 2 trilyon dolları ötüb. Biz millətimizi bu bəladan xilas etmək əzmindəyik. Dayanmadan və sürətlə irəliləyirik."