Rusiya Prezidenti Vladimir Putin Ukraynanı işğal olunmuş şərqi Ukrayna ərazisində tələbə yataqxanasına ölümcül hücumda ittiham etdikdən sonra buna cavab verəcəyini bildirib.

O, Luhansk bölgəsinin Starobilski şəhərində gecə saatlarında dron zərbəsi nəticəsində 6 nəfərin öldüyünü, 39 nəfərin yaralandığını, 15 nəfərin isə itkin düşdüyünü deyib.

Kremlin dəstəklədiyi yerli hakimiyyət orqanları dağılan binanın və xilasetmə işçilərinin axtarışlarının fotolarını yayımlayıb.

Ukrayna ordusu Starobilski şəhərində Rusiyanın elit Rubikon dron hərbi birliyinin qərargahının vurulduğunu açıqlayıb.

BBC Starobilski hadisəsini müstəqil təsdiq etməyib.

Cümə günü Kremldə qəbul mərasimində Putin bildirib ki, Ukraynanın hücumu üç dalğa üzrə 16 dronla həyata keçirilib.

“Ətrafda hərbi obyektlər, təhlükəsizlik xidməti obyektləri və ya əlaqədar xidmətlər yoxdur.

“Buna görə, bizim hava hücumundan müdafiə və elektron müharibə sistemlərimizin təsiri ilə partlayıcı qurğuların binaya dəydiyi iddiası tamamilə əsassızdır,” - deyə o qeyd edib.

Putin Rusiya ordusuna qarşılıq verilməsi ilə bağlı “təklifləri” hazırlamağı tapşırıb.

Rusiyanın dövlət televiziyası yaralı tələbələrdən birinin, 19 yaşlı Diana Shovkun olduğunu iddia etdiyi şəxsin görüntüsünü yayıb.

Moskva tərəfindən öldürüldüyü deyilənlərin fotoları və videoları göstərilməyib.

Daha sonra cümə günü Ukrayna ordusu hücumu üzərinə götürüb. Rubikon döyüşçülərini Ukraynanın mülki şəxslərinə və mülki infrastruktura müntəzəm zərbələr endirməkdə ittiham edib.

Bəyanatda Ukrayna qüvvələrinin “bəyi qanunları, müharibə qaydaları və beynəlxalq humanitar hüquq normalarına ciddi riayət etməklə hərbi infrastruktur və hərbi məqsədlər üçün istifadə olunan obyektlərə zərər verdiyi” qeyd olunub.

Cümə axşamı Ukrayna Prezidenti Volodimir Zelenski Moskvaya məxsus FSB təhlükəsizlik xidmətinin qərargahının Rusiyanın nəzarətində olan Xerson bölgəsində vurulduğunu bildirib.

O əlavə edib ki, təxminən 100 rus “işğalçı” ya öldürülüb, ya da yaralanıb.

Moskvanın hərbi qüvvələri məsələyə münasibət bildirməyib. Lakin Kremlin dəstəklədiyi bir Telegram kanalı “kütləvi dron zərbəsi” iddia etdikdən sonra “itkilər” olduğunu xəbər verib.

Ukrayna, Moskvanın 2022-ci ildə başlatdığı tammiqyaslı işğalından bəri Rusiya ordusunu bilərəkdən mülki şəxsləri hədəf almaqda təkrar-təkrar ittiham edir, bu ittiham isə Moskva tərəfindən müntəzəm şəkildə rədd olunur.

Ötən həftə Ukrayna rəsmiləri bildiriblər ki, Paytaxt Kiyevdə rus raketinin çoxmərtəbəli yaşayış binasını partlatması nəticəsində 24 nəfər, o cümlədən üç qız ölüb.